स्याङ्जाको वालिङ–चापाकोट सडकखण्डमा ट्याक्टर दुर्घटना हुँदा दुई जनाको मृत्यु भएको छ भने चार जना घाइते भएका छन् ।

वालिङ नगरपालिका–७ धोडेपानी नजिक सोमबार दिउँसो वालिङबाट ढुंगा बोकेर चापाकोटतर्फ जाँदै गरेको लु ३ त ५१७३ नम्बरको ट्याक्टर आफैं अनियन्त्रित भई सडकबाट करिब १० मिटर तल खोल्सामा खसेको प्रहरीले जनाएको छ ।

दुर्घटनामा घाइते भएका छ जनालाई तत्काल उपचारका लागि प्राथमिक स्वास्थ्य केन्द्र वालिङ लगिएको थियो । उपचारका क्रममा वालिङ नगरपालिका–७ केवरे निवासी ६५ वर्षीय डोलराज कोइराला र कैलाली टिकापुर नगरपालिका–७ निवासी ३५ वर्षीय राजकुमार चौधरीलाई चिकित्सकले मृत घोषणा गरेका हुन् ।

दुर्घटनामा ट्याक्टर चालक पश्चिम नवलपरासी सरावल गाउँपालिका–१ आनन्दनगरका २८ वर्षीय लालबहादुर सुनार, कैलाली लम्कीचुहा नगरपालिका–५ का २२ वर्षीय श्याम चौधरी र ३९ वर्षीय लक्ष्मण चौधरी तथा दाङ राप्ती गाउँपालिका–५ का ३५ वर्षीय हुकुमबहादुर दर्लामी मगर घाइते भएका छन् । उनीहरू सबैको शरीरका विभिन्न भागमा चोट लागेको र थप उपचारका लागि पोखरा रिफर गरिएको सूचना अधिकारी तथा प्रहरी नायब उपरीक्षक प्रसन्न राज चौधरीले जानकारी दिए ।

सूचना प्राप्त हुनासाथ प्रहरी चौकी केवरेबाट प्रहरी सहायक निरीक्षक नेत्रबहादुर कुमालको कमाण्डमा टोली घटनास्थलमा पुगेको थियो । दुर्घटनाको कारणबारे थप अनुसन्धान भइरहेको जिल्ला प्रहरी कार्यालय स्याङ्जाले जनाएको छ ।