स्याङ्जाको पुतलीबजार नगरपालिका–३ कुमालगाउँस्थित प्रदेश अस्पताल पुतलीबजार स्याङ्जामा शव पोस्टमार्टमका क्रममा तोकिएको शुल्कभन्दा बढी रकम लिएको आरोप लागेको छ ।

अर्जुनचौपारी गाउँपालिका–४ सुनारटोलकी ३५ वर्षीया सबिना सुनारको शव पोस्टमार्टम गर्दा तोकिएकोभन्दा २ हजार ७५० रुपैयाँ बढी रकम लिएको भन्दै उजुरी परेपछि प्रशासनले छानबिन थालेको हो ।

भदौ २९ गते भिरबाट लडेर मृत्यु भएकी सुनारको भोलिपल्ट प्रदेश अस्पतालमा पोस्टमार्टम गरिएको थियो । पोस्टमार्टमका क्रममा बरफको फ्रिजमा राखेकोसहित १ हजार रुपैयाँको रसिद काटेर शुल्क लिने व्यवस्था भए पनि मृतकका आफन्तबाट ३ हजार ७५० रुपैयाँ लिइएको आरोप छ ।

अस्पतालमा कार्यरत प्रहरी हवल्दार सम्सेर आलम खानले तोकिएको शुल्कभन्दा बढी रकम मागेको र कम रकमको रसिद दिएको भन्दै मृतकका जेठाजुका छोरा दीपक विकले प्रशासनमा उजुरी दिएका थिए । उजुरीपछि घटनाबारे अनुसन्धान अघि बढाइएको हो ।

उजुरी परेपछि जिल्ला प्रहरी कार्यालय स्याङ्जाले हवल्दार खानलाई अस्पतालमा रहेको जिम्मेवारीबाट हटाएर कार्यालयमा तानेको छ । अनुसन्धानका क्रममा हवल्दारले रकम लिएको स्वीकार गरेका छन् भने उनले अस्पतालमा कार्यरत अन्य कर्मचारी र कार्यालय सहयोगीहरुको नाम समेत पोलेको हुँदा उनीहरुलाई पनि सोधपुछ गरिरहेको प्रजिअ घिमिरेले बताएका छन् ।

घटनामा दोषी ठहर भए कानुनअनुसार कारबाही गरिने प्रमुख जिल्ला अधिकारी निराजन घिमिरेले बताए ।

घिमिरेले दुःखमा रहेका मृतकका आफन्तलाई सहानुभूति दिनुपर्ने अवस्थामा तोकिएको शुल्कभन्दा बढी रकम असुल गर्नु गलत भएको बताए ।

“शोकमा रहेका परिवारसँग तोकिएकोभन्दा बढी रकम लिनु गम्भीर विषय हो । अनुसन्धानबाट दोषी देखिए कानुनअनुसार कारबाही हुन्छ,” उनले भने ।

प्रदेश अस्पताल स्याङ्जाका प्रमुख डा. सुप्रिया पौड्यालले भने पोस्टमार्टमका लागि अस्पताल व्यवस्थापन समितिको निर्णयअनुसार १ हजार रुपैयाँ शुल्क लिने व्यवस्था रहेको बताइन् । तोकिएकोभन्दा बढी रकम लिइएको विषयमा भने अनुसन्धान भइरहेकाले तत्काल थप भन्न नमिल्ने उनको भनाइ छ ।

प्रदेश सरकारको स्वास्थ्यसम्बन्धी ऐनमा पोस्टमार्टमका लागि शुल्क लिने विषय स्पष्ट रूपमा उल्लेख नभए पनि अस्पतालको सेवा शुल्क परिमार्जन समितिले २०७९ चैत २६ गते पोस्टमार्टमका लागि १ हजार रुपैयाँ शुल्क लिने निर्णय गरेको थियो ।

सोही निर्णयअनुसार पोस्टमार्टमका क्रममा १ हजार रुपैयाँको रसिद काट्ने गरिएको अस्पतालले जनाएको छ । तर, सुनारको शव पोस्टमार्टम गर्दा त्यसको तीन गुणाभन्दा बढी रकम लिएको आरोप लागेपछि विषय छानबिनमा पुगेको हो ।

प्रशासनले उजुरी र घटनासँग सम्बन्धित विवरणका आधारमा अनुसन्धान अघि बढाएको जनाएको छ । अनुसन्धानबाट रकम बढी लिएको पुष्टि भए संलग्नमाथि प्रचलित कानुनअनुसार कारबाही हुने प्रशासनको भनाइ छ ।