नारायणप्रसाद सापकोटाको पहिलो कविता संग्रह ‘युगान्तर’ प्रकाशित भएको छ ।

कास्कीको मादी गाउँपालिका वडा नम्बर ४ तारकाङ, केउरानी, रातमाटामा वि.सं. २०४१ सालमा जन्मेका सापकोटा हाल पोखरा १३ साझाका बासिन्दा हुन् ।

पेसाले अङ्ग्रेजी प्राध्यापनमा रहेका उनी भद्रकाली बहुमुखी क्याम्पसका सहायक क्याम्पस प्रमुख हुन् । त्रिभुवन विश्वविद्यालयको ग्राजुएट स्कुल अफ एजुकेसनबाट विद्यावारिधि (पिएचडी) तहको अध्ययन गर्दै गरेका सापकोटा सिर्जनात्मक र प्राज्ञिक दुवै लेखनमा समता र सामाजिक न्यायको खोजी गर्छन् ।

साहित्यपोस्टले प्रकाशन गरेको यो कृतिमा जम्मा ५५ वटा कविताहरु समेटिएका छन् । यी कविताहरुलाई पढेर, काव्यचित्र हेरेर, वाचन सुनेर वा हेरेर ग्रहण गर्न सकिन्छ । यसरी आफ्नो पहिलो कृति मार्फत लेखक सापकोटाले नेपाली साहित्यमा पहिलोपटक बहुआयामिक स्वाद दिएका छन् ।

सापकोटाको नेपाली साहित्य सिर्जना रुचिको विषय हो । यसअघि थुप्रै फुटकर लेखरचनाहरु प्रकाशन गरिसकेका उनको ‘युगान्तर’ पहिलो पुस्तकाकार कृति हो ।

‘आफ्नो पहिलो कृति मार्फत पाठकलाई काव्यिक रचना पठनसँगै चित्र र श्रव्यदृश्यको बहुआयामिक अनुभूति गराउने प्रयास गरेको छु,’ लेखक सापकोटाले भने ।

पुस्तक प्राप्त गर्न चाहने पाठकले ९८५६०३३२६८ मा सम्पर्क गर्न सक्नेछन् । यस्तै सल्लाह, सुझाव र प्रतिक्रियाका लागि लेखकलाई इमेल ठेगाना [email protected] मा सम्पर्क गर्न सकिने जनाइएको छ ।