पोखरा । कास्की एन्फा द्वारा आयोजित छैंटौं मनकामना केबलकार पोखरा कपको अन्तिम क्वाटर फाइनलमा नेपाल पुलिसले संकटा यूवा क्लबलाई २–१ गोलले पराजित गर्दै दोश्रो चरणमा प्रवेश गरेको छ ।

खेलको पहिलो हाफको ११ औं मिनेटमा संकटाले पुलिस विरुद्ध गोलको खाता खोलेर दबाब दिने प्रयास गरे पनि त्यो सफल हुन सकेन । रोशन पाहारीको लामो पासलाई विपक्षीको डि बक्स भित्रै रहेका विदेशी खेलाडी म्याक्सवेल एलोनले वन टचमा बललाई गोलको दिशा देखाएका थिए ।

एक गोलले पछि परेको पुलिसले ३१ औं मिनेटमा अभिषेक रिजालले गोल गर्दै बराबरीमा ल्याएका थिए । संकटाको डि एरियामा रहेका निर कुमार राईले गोल गर्ने प्रयास रहेकै बेला अनमार्क रहेका रिजाललाई ब्याक पास दिंदै गोल गर्ने अबसर जुटाएका थिए ।

तिन जना बिदेशी खेलाडी सहित मैदानमा उत्रिएको संकटा विदेशी खेलाडीकै गल्तिका कारण दोश्रो गोल हुन पुग्यो । खेलको ४९ औं मिनेटमा विदेशी खेलाडी ताम्पी ऐरनेष्टले आफ्ना किपर राजा बाबु थापालाई दिएको ब्याक पासमा किपरले कलेक्ट गर्न ढिला गर्दा नजिकै रहेका रबी पासवानले गोल गर्ने अबसर पाए ।

खेलममा पुलिसका रबी पासवान घोषित हुँदै नगद पाँच हजारका साथमा ट्रफी पाए ।

खेलको पहिलो हाफमा आक्रमक खेलेको संकटाले दोश्रो हाफमा भने खेलको गतीलाई शुष्त पार्दै गोल फर्काउने प्रयास गरेको थियो । खेलको अन्तिम समयमा लक्ष्मण रुचालले मैदानको करिब २१ यार्ड टाढा बाट हानेको कडा प्रहारलाई पुलिसका किपर शत्रुधन चौधरीले आर्कषक रुपमा बचाएका थिए ।

खेल पछि प्रतिक्रिया दिंदै नेपाल पुलिसका प्रशिक्षक अनन्त थापाले गोल खाइ सक्दा पनि टिमले सम्हालिएर खेलको कारण जितको हकदार बनेको बताए । उनले भने–“हाम्रो राणनितीनै जित्नु थियो तर एक गोल उपहारका रुपमा पाँयौं जुन जितका लागि काफी थियो ।”

यता संकटाका सल्यान खडगीले आफ्नो टिमले रणनिती अनुसार खेलाडीले आक्रमक रुपमा खेलेको तर आफ्नै गल्तीले गोल खान पुगेको बताए ।

आइतबार पहिलो क्वाटर फाइनल खेल थ्रि स्टार र शसस्त्र प्रहरीका विच हुने आयोजकले जनाएको छ ।

पाेखरा स्पाेर्टस् डटकमबाट । तस्विर: गाेलनेपाल