पोखरा (हाम्रो खेलकुद) – उपाधिको दाबेदार मध्येको एक थ्री स्टार क्लबलाई १–० ले  स्तब्ध बनाउदै विभागीय नेपाल एपीएफ क्लब छैटौं संस्करणको मनकामना केबुलकार पोखरा कप फुटबल प्रतियोगिताको सेमिफाइनलमा प्रवेश गरेको छ ।

पोखरा रंगशालामा आइतबार भएको पहिलो क्वाटरफाइनलमा एपिएफले खेलको शुरुवाती मिनेटमै गरेको गोल नै निर्णायक भएको हो । एपिएफका लागि सन्तोष श्रेष्ठले खेल शुरु भएको २६ सेकेण्डमै गोल गरेका हुन् । त्यसपछि थ्री स्टारले खेलमा पकड जमाएपनि एपीएफको बलियो रक्षापङ्ति तोड्न नसक्दा पहिलो खेलबाटै बाहिरिन पुग्यो ।

यता, एपीएफल लिएको अग्रता खेलको अन्त्यसम्म बचाइराख्न सफल भयो । उत्कृष्ट प्रदर्शन गरेका एपीएफका डिफेन्डर रमेश दंगाल खेलको म्यान अफ दि म्याच घोषित भए ।

बिजयी भएपछि पोष्ट म्याच कन्फिरेन्समा बोल्दै एपिएफका प्रशिक्षक राजेन्द्र तामाङले रक्षापंक्ती बलियो बनाएर काउन्टर अट्याकमार्फत गोल गर्ने रणनीतिमा आफू सफल भएको बताउँदै जितप्रति खुशी व्यक्त गरे । उनले पहिलो सरप्राइज गोलका कारण बलियो टीम थ्रीस्टारबिरुद्ध जित निकाल्न सकिएको बताए ।

पराजित थ्रीस्टारका प्रशिक्षक मेघराज केसीले खेलको पहिलो मिनेट नबित्दै सरप्राइज गोल खानु नै हारको प्रमुख कारण भएको बताए । उनले बिपक्षी एपिएफका खेलाडीले आफ्नो बलियो टिमलाई ९० मिनेटसम्म रोक्न सक्नु उनीहरुको सफलता भएको उल्लेख गरे ।

प्रतियोगिता अन्तर्गत सोमबार नेपाली सेनाको त्रिभूवन आर्मी क्लव र डफिन्स टिम फेमेली क्यामरुन प्रतिष्पर्धामा उत्रिनेछन् । आर्मी बाई पाएर क्वाटर फाइनलमा आएको हो भने क्यामरुन च्यासल युथ क्लवलाई पराजित गर्दै क्वाटरफाइनलमा आइपुगेको हो ।

Pic. GoalNepal