पोखरा, १४ फागुन । साविक विजेता नेपाल पुलिसलाई हराउँदै क्यामरुनको दाफिन्स फ्यामिली टोली पोखरामा जारी १७ औं संस्करणको आहा ! रारा गोल्डकपको सेमिफाइनलमा प्रवेश गरेको छ । पोखरा रंगशालमा मंगलबार भएको अन्तिम क्वाटरफाइनलमा नेपाल पुलिसलाई २–१ ले पराजित गर्दै दाफिन्स सेमिफाइनलमा प्रवेश गरेको हो हो ।

निर्धारित समयको खेल १–१ को बराबरीमा सकिएपछि खेल अतिरिक्त समयमा धकेलिएको थियो । अतिरिक्त समयको चौथो मिनेटमा यान्निकले गरेको गोलले दाफिन्सले सेमिफाइनलमा स्थान पक्का गरेको हो । त्यसअघि खेलको ३७ औं मिनेटमा बिजिकको गोलबाट दाफिन्सले खेलमा अग्रता बनाएको थियो । कर्नरबाट आएको बललाई बक्सभित्रबाट हाफ भली प्रहार गर्दै उनले गोलमा परिणत गरेका थिए ।

खेल सकिनै लाग्दा सुमन लामाको क्रसमा सुमन सुवेदीले हेड गोल गर्दै खेललाई बराबरीमा पुर्याए । त्यसपछि खेल अतिरिक्त समयमा पुग्यो । तर, पुलिसले दाफिन्सलाई अतिरिक्त समयमा रोक्न सकेन । खेलको अन्तिम समयमा पुलिस १० खेलाडीमा समेटिएको थियो । पुलिसका हरि कठायतले रातो कार्ड पाएका थिए ।

यसअघि, तिलोत्तमा गोल्डकप फुटबल प्रतियोगिताको फाइनलमा सोमबार दाफिन्सले पुलिसलाई सडनडेथमा पराजित गरेको थियो । प्रतियोगितामा भोलिबाट सेमिफाइनलका खेल हुनेछन । पहिलो सेमिफाइनल खेल  विभागीय टोली नेपाल एपीएफ क्लब र रुस्लान थ्री स्टार क्लबबीच हुनेछ । त्यस्तै दोस्रो सेमिफाइनलमा  त्रिभुवन आर्मी क्लब र दाफिन्सबीच खेल हुनेछ । दाफिन्सले लगातार तीन प्रतियोगिता जितेर उपाधिमाथि नै ह्याट्रिक गरेको छ । पोखराको मनकामना केबलकार कप जितेको क्यामरुने टोलीले धरानमा बुढासुब्ब ागोल्डकप र बुटवलमा हिजोमात्रै तिलोत्तमा गोल्डकप जितेको हो ।

प्रतियोगिताको विजेताले उपाधि सहित ८ लाख एक हजार र उपविजेताले ४ लाख एक हजार साथमा ट्रफी, मेडल र प्रमाण पत्र प्राप्त गर्नेछन् । प्रतियोगितामा उत्कृष्ट हुने खेलाडीले स्कुटर पाउने छन् । त्यस्तै उत्कृष्ट गोलरक्षक, डिफेन्स, मिडफिल्डर, स्ट्राइकर र प्रशिक्षकलाई समान १५ हजार रुपैयाँका साथै ट्रफी प्रदान गरिने छ । सर्वाधिक गोलकर्तालाई २५ हजार रुपैयाँका साथै ट्रफी प्रदान गरिने छ ।

त्यस्तै प्रतियोगिताको प्रिक्वाटरफाइनल खेल विजेता टिमलाई २० हजार र उपविजेता टिमलाई १०, क्वाटरफाइनल विजेता तथा उपविजेतालाई ३० र २० हजार, सेमिफाइनल विजेता तथा उपविजेता दुवै टिमलाई ५० हजार नगद प्रदान गरिने आयोजकले जनाएको छ ।