पोखरा । सोमबार दिउँसो करिब साँढे तीन बजेदेखि हावाहुरीसहित परेको पानीका कारण सडकमा भल बगेको मौका छोपी जथाभावी फोहोर फालेकालाई पोखरा महानगरपालिकाले कारवाही गर्ने भएको छ । पानी परेको बेला घरको कौसीबाट सडकमा फोहर फाल्नेलाई कारबाही गर्न भन्दै टेलिफोन मार्फत उजुरी परेपछि महानगरपालिकाले कारवाही गर्ने जनाएको नागरिक अभियन्ता रामबहादुर पौडेलले फेसबुकमा लेखेका छन् ।

पौडेलले लेखेका छन्, ‘कान्तिपुर पब्लिकेशनका समाचारदाताले खिचेको भिडियोका आधारमा फोहोर फाल्ने घरको पहिचान गरिसकेकाले आवश्यक कारबाहीका लागि प्रक्रिया पु¥याएर महानगरपालिकामा उपस्थित गराई जरिवाना लगाइने व्यहोरा सरसफाइ शाखाका प्रमुख कल्पना बराल मार्फत जानकारी प्राप्त भएको छ।’

पौडेलको पोष्टमा लेखनाथ पौडेलले कमेन्ट फर्काए, ‘को हो त्यो फोहर फाल्ने ? के कारबाही भो ? भोलिको समाचारमा हेर्न पाईयोस् ।’ बिष्णु गुरुङले थपे, ‘हामी रातदिन सफा गर्दै सफा राख्नुसु भन्दै हिँड्नी, उनीहरु यस्ता पशुको काम गर्नी, मानिसहरु किन यति नराम्रो काम गर्छन् ? महानगरले कारबाही गर्नी भयो भन्दा खुशी लाग्यो ।’

भिडियो खिच्ने पत्रकार दीपक परियारले सोहि दिन भिडियो शेयर गर्दै लेखेका थिए – ‘पोखराको सिर्जनाचोकभन्दा केही तल । कान्तिपुर पब्लिकेसन्स्को कार्यालय अगाडि । पानी परिरहेको समय । बाटोमा भल बगेको छ । कतैबाट बग्दै आएका छन्, भलमा फोहोर । चार तले घरको छतमा छन्, सभ्य मानिसहरु । छतबाट बोराका बोरा फोहोर मिल्क्याउँदै छन् । आफुमात्रै होइन, बच्चालाई पनि फोहोर मिल्क्याउँन लगाउँदै छन् । ती बच्चाले के सिके हुँदाहुन् ? अभिभावकले के सिकाउँदा हुन् ? एकपल्ट भिडियो हेरौं ।’

पोखरामा महानगरपालिकाको फोहोर संकलन गर्ने गाडी नियमित आउने नगरेको भन्दै स्थानीयहरुले जथाभावी फोहोर फाल्ने गरेको दृश्य कुनै नौलो कुरा हैन ।