काठमाडौँ । संस्कृति, पर्यटन तथा नागरिक उड्डयन मन्त्री योगेश भट्टराईले नयाँ ‘संस्कार’को सुरुवात गरेका छन् । मन्त्री भट्टराईले प्रमुख प्रतिपक्षी दल नेता नेपाली कांग्रेसका सभापति शेरबहादुर देउवालाई भेटेर आफ्नो मन्त्रालयले गरीरहेको कामको बारेमा जानकारी दिएका हुन् ।

शनिबार बिहान देउवा निवास बूढानीलकण्ठमा भेटेर उनले मन्त्रालयका तर्फबाट भइरहेका कामकारबाही र वार्षिक कार्यक्रमको योजनाका बारेमा जानकारी गराएका हुन्। शनिबार फेसबुकमा पोस्ट गर्दै उनले देउवालाई भेटेर भ्रमण वर्ष २०२० का बारेमा पनि जानकारी गराएको बताए।

‘मन्त्रालयका काम र भ्रमण वर्ष २०२० को बारेमा उहाँले अभिरुचिका साथ सुन्नुका साथै महत्त्वपूर्ण सल्लाह सुझाव दिनु भएको छ। त्यसका लागि म उहाँलाई हार्दिक धन्यवाद ज्ञापन गर्दछु’, उनले फेसबुक स्टाटसमा लेखेका छन्।

यसअघिसम्म मन्त्रीहरुले प्रमुख प्रतिपक्षी दलका नेतालाई मन्त्रालयको कामको बारेमा जानकारी दिने प्रचलन थिएन । मन्त्रीले प्रमुख प्रतिपक्षी दलका नेतालाई भेटेर आफ्ना मन्त्रालयको कामको योजना सुनाएर असल राजनीतिक संस्कारको सुरुवात गरेको भन्दै सामाजिक सञ्जालमा प्रशंसा भएको छ । यो पहिलो र नयाँ राजनीतिक संस्कारको सुरुवात भएको धेरैले उल्लेख गरेका छन् । मन्त्रीहरूले प्रमुख प्रतिपक्षी दलका नेतालाई मन्त्रालयको कामबारे जानकारी दिने प्रचलन यसअघि नभएको प्रतिक्रियाहरु आएका छन् ।