तनहुँ । नेष्डो र रोट्रयाक्ट क्लबले सामुदायिक विद्यालयलाई खानेपानी धारा बनाईदिएको छ । नेष्डो समृद्ध लघुवित्त वित्तीय संस्थाको मुख्य सहयोगमा जनता आधारभुत विद्यालयलाई खानेपानी ट्याङ्की सहित धारा निर्माण गरिएको हो ।

रोट्रयाक्ट क्लब अफ दमौली, रोट्रयाक्ट क्लब अफ पर्वत पोखरा र रोट्रयाक्ट क्लब अफ लिबर्टी कलेजको संयुक्त प्रयासमा उक्त धारा संगै पानीट्याङ्की र पानी शुद्धीकरण मेसिन विद्यालयलाई प्रदान गरिएको हो । व्यास-१० स्थित आहालेचौर जनता आधारभूत विद्यालयमा उक्त खानेपानि धारा निर्माण गरि हस्तान्तरण गरिएको हो ।

कार्यक्रमको अध्यक्षता रोट्रयाक्ट क्लब अफ दमौलीका अध्यक्ष मनोज राउत र रोट्रयाक्ट क्लब अफ पर्वत पोखराका अध्यक्ष रोभिन पोख्रेलले संयुक्त रूपमा गरेका थिए ।

कार्यक्रमको प्रमुख अतिथि नेष्डो नेपालका कार्यकारी निर्देशक एवं रोटरीयन विश्वप्रकाश प्रसाई रहेका थिए ।

सो अवसरमा प्रमुख अतिथि प्रसाईले सामाजिक उत्तरदायित्व बहन गर्दै विद्यालयमा सहयोग गरेको उनले बताए । सदरमुकामबाट नजिक भएर पनि विद्यालयमा खानेपानीको समस्या भएको सुने पश्चात रोट्रयाक्ट संग मिलेर सहयोग गरेको बताए । युवाहरु सामाजिक क्षेत्रमा लाग्नु धेरै राम्रो भएको समेत उनले बताए ।

कार्यक्रममा रोट्रयाक्ट नेपाल जोन ३ का जेडआरआर शिखरलाल डोटेल, व्यास-१० का वडासदस्य हेमराज पोख्रेल, विद्यालयका प्रधानाध्यापक बुद्धि बहादुर बराली, विद्यालय व्यवस्थापन समितिका अध्यक्ष तिर्थ बहादुर विक लगाएतले बोलेका थिए ।

कार्यक्रमको स्वागत रोट्रयाक्ट क्लब अफ लिबर्टी कलेजका निवर्तमान अध्यक्ष बिनय महर्जनले गरेका थिए भने कार्यक्रमको संचालन रोट्रयाक्ट क्लब अफ पर्वत पोखराकी सचिव सुष्मा प्रसाईले गरेकी थिइन ।

त्यस्तै नेष्डो समृद्ध लघुवित्त वित्तीय लिमिटेडले विद्यार्थीहरु लाई सरसफाईका सामग्रीहरु वितरण गरेको थियो ।