आशिष पुरी । पोखरा क्षेत्रिय अन्तर्राष्ट्रिय विमानस्थल निर्माणको ६२ प्रतिशत काम सम्पन्न भएको छ । विमानस्थल १० जुलाई २०२१ सम्म निर्माण सम्पन्न गर्ने सम्झौता भएको थियो । कोरोना महामारी आउनुअघिसम्म ६ महिना अघि नै काम सम्पन्न गरिसक्ने बताउँदै आएको निर्माण पक्ष कोरोना कहरले भने काम सोचेनुरुप अघि बढ्न सकेन ।

कोभिड-१९ का कारण सरकारले देशैभरी लकडाउन गरेपछि निर्माण सामाग्री ढुवानीमा परेको समस्या, मजदुर एवं प्राबिधिकहरुको अभावले निर्माणको काम सुस्त भएको थियो । तर, लकडाउन खुलेपछि भने काम धमाधम भइरहेको छ ।

लकडाउनका कारण केहि समस्या आएपनि समयमै सक्ने गरी काम भैरहेको पोखरा क्षेत्रीय विमानस्थलका आयोजना प्रमुख विनेश मुनाकर्मीले बताएका छन् ।

राष्ट्रिय गौरवको आयोजना पोखरा क्षेत्रीय अन्तर्राष्ट्रिय विमानस्थलको धावनमार्ग, टयाक्सी-वे र एप्रोन निर्माणसहित कन्ट्रोल टावर भवनको स्टिल स्ट्रक्चरको काम सम्पन्न भएको छ । विमानस्थलको आन्तरिक तथा बाह्य टर्मिनल भवनको अधिकाशं काम सम्पन्न भएर फिनिसिङको चरणमा छ भने विमानस्थलको हालसम्म समग्रमा ६२ प्रतिशत काम सकिएको आयोजनाले जनाएको छ ।

अहिले निर्माणस्थलको ह्याङ्गर भवन लगाएत मुख्य टर्मिनल भवनको छतमा ट्रस्ट राख्ने काम सकेर विद्युत जडान गर्ने सहित फिनिसिङ्गको काम भैरहेको आयोजनाले जनाएको छ ।