काठमाण्डौ, २१ माघ / पोखरामा बाइकको रिकन्डिसन व्यवसाय गर्दै आएका अमित श्रेष्ठ अचानक युवाहरुका बीचमा लोकप्रिय बनेका छन् । कठीन र साहसिक कार्यमार्फत करिब ४ हजार राइडरहरु मध्येबाट उनी ‘बेस्ट राइडर’ घोषित भएका छन् ।

बजाज बाइकको नेपालका लागि आधिकारिक वितरक हंसराज हुलासचन्द एन्ड कम्पनीले सामसुङसँगको सहकार्यमा आयोजना गरेको पल्सर डेयरभेन्चरको तेस्रो संस्करणमा अन्तिम १० प्रतिस्पर्धिलाई पछि पार्दै अमित बेस्ट राइडर बनेका हुन् । यति मात्र होइन, अमितले सामसुङ अनस्टपेवल राइडरको उपाधि समेत प्राप्त गरे । यसवापत उनले सामसुङ एस८ मोबाइल पनि प्राप्त गरेका छन् । अमितलाई हंसराज हुलासचन्द एन्ड कम्पनीका कार्यकारी निर्देशक शेखर गोल्छाले पुरस्कृत गरेका थिए ।

पल्सर डेयरभेन्चरको यो तेस्रो संस्करण हो । रोचक कुरा के छ भने अमितले यो भन्दा पहिले पनि डेयरभेन्चरको पहिलो र दोस्रो संस्करणमा समेत भाग लिएका थिए । तर पहिलोमा उनी टप २० र दोस्रोमा टप १० भित्र पर्न सकेका थिएनन् । यस पटक भने उनले सबैलाई चकित पार्दै डेयरभेन्चर विजेता बने ।

पल्सर डेयरभेन्चर एक प्रकारको कठीन प्रतिस्पर्धा हो । यसमा भाग लिनेले बाइक राइडिङ कौशल मात्रै नभएर विभिन्न शारीरिक अभ्यास समेत गर्नुपर्छ । रक क्लाइम्बिङ गरी त्यहाँ भएको बाइकको चाबी लिएर स्वीमिङ पुलमा गएर बाइकको सामान निकालेर फिट गर्ने जस्ता कठीन कार्य समेत गर्नुपरेको थियो ।

पल्सर डेयरभेन्चरको तेस्रो सिजनमा अन्तिम १० साहसी प्रतियोगीहरुले नयाँ पल्सर बाइकमा ‘अन÷अफ रोड’ हुँदै एउटा साहसिक राइडमा जाने मौका पाएका थिए । प्रतियोगितामा सामेल हुनका लागि प्रतियोगिहरुले शुरुवातमा नै विभिन्न तालिमहरु लिनुपर्ने व्यवस्था गरिएको थियो । डेयरभेन्चरको क्रममा यो वर्ष उनीहरुको समूह मनाङको खाङसारसम्म पुगेको थियो ।

हरेक बाइकर्सले पल्सर डेयरभेन्चर ३ को अन्तिम १० मा छनोट हुन अडिसन, फिजिकल फिटनेस टेस्ट, अब्स्ट्याकल टेस्ट, मेडिकल टेस्ट र एप्टिच्युड टेस्ट पास गर्नुपर्ने व्यवस्था गरिएको थियो भने अन्तिम १० प्रतिस्पर्धीहरुका लागि ग्रुमिङ सेसन समेत आयोजना गरिएको थियो ।

प्रतियोगिताका दौरान प्रतिस्पर्धिहरु काठमाडौँबाट शुरु भएर घाँसीकुवा, बेशिशहर, बाहुनडाँडा हुँदै मनाङको खाङसार पुगेका थिए ।

काठमाडौंको विजय मेमोरियल उच्च माविबाट प्लस टु र पोखराको जनप्रिय बहुमुखी क्याम्पसबाट व्यवस्थापनमा स्नातक गरेका अमितले हाल पोखरामै न्यु एरा रिकन्डिसन चलाइरहेका छन् । उनको रिकन्डिसन हाउसमा सबै बाइकको सट्टापट्टा भए पनि बजाजको पल्सर नै बढी सट्टापट्टा हुने उनले बताए । आगामी दिनमा युवाहरुको चाहना अनुसारका विभिन्न बाइकिङ गतिविधि गर्दै जाने योजना रहेको समेत उनी बताउछन् ।

सामान्य ब्यक्तिबाट अमित अव सेलिब्रेटीमा परिवर्तन भएका छन् । धेरै युवाहरु उनको फ्यान बनेका छन् । डेयरभेन्चरको इभेन्टलाई टेलिभिजनको पर्दामा समेत देखाइएको र अन्य कुराका अतिरिक्त एसएमएस भोटिङका आधारमा समेत विजेताको घोषणा गरिएको थियो । त्यसैले उनले यो उपाधि प्राप्त गर्नका लागि पनि धेरै दर्शक र खासगरी युवायुवतीहरुको पनि भूमिका छ । सबै फ्यानहरुको चाहना अनुसार अब जिम्मेवारीपूर्वक आगामी यात्रा तय गर्ने अमित बताउछन् ।

Nepal Auto बाट

पल्सर डेयरभेन्चर विजेता अमित