गण्डक न्युज धरान, २७ माघ  / रुस्लान थ्रीस्टार क्लब बुढासुब्बा रेडबुल गोल्डकप फुटबल प्रतियोगिताको उपाधि जित्न सफल भएको छ । फाइनलमा थ्रीस्टारले नेपाल पुलिस क्लबलाई १-० ले हराउन सफल रह्यो ।

गत शनिबार पोखरामा आहा रारा गोल्डकपमा यही स्कोरले पुलिसले उपाधि उचालेको थियो । थ्रीस्टारले एक सातामै बदला लिन सफल भएको हो । यस जितसँगै थ्रीस्टारले सिजनको दोस्रो उपाधि जितेको छ । धनगढीमा भएको नेपाल आइस सुदूरपश्चिम खप्तड गोल्डकपमार्फत भन्डै डेढ वर्षपछि घरेलु फुटबलमा फर्केको थ्रीस्टारले यहि महिना इटहरी गोल्डकपको उपाधि उचाल्न पनि सफल भएको थियो । थ्रीस्टारले लगातार तीन हप्ता तीन गोल्डकपमा फाइनल पुगेर दुई उपाधि जित्न सफल समेत बनेको छ ।

थ्रीस्टारका लागि अजयी मार्टिन्सले पहिलो हाफको अन्तिम समयमा गोल गर्दै टोलीलाई अग्रता दिलाएका थिए । दुवै टोलीले दोस्रो हाफमा केहि अवसर पाए पनि मार्टिन्सको पहिलो हाफको गोल नै खेलमा निर्णायक बन्न सफल भयो ।

खेलको २५ औं मिनेटमा घाइते भएका थ्रीस्टारका विक्रम लामा उपचारका लागि काठमाडौं पठाइएको छ । खेलको २७ औं मिनेटमा पुलिसका हेम तामाङ र थ्रीस्टारका सेगुनले रातो कार्ड पएपछि दुवै टोली १० खेलाडिमा सीमित भएका थिए ।

यस जितसँगै माघ २० गते पोखरामा भएको आहा रारा गोल्डकपमा पुलिससँग १–० ले हार व्यहोरेको थ्रि स्टारले सो हारको बदला पनि लिन सफल भएको छ ।

पुलिसले बुधबार पहिलो सेमिफाइनलमा संकटा क्लबलाई २–१ ले हराउँदै फाइनलमा स्थान सुरक्षित गरेको थियो । बिहीबार भएको खेलमा भारतको दुर्गापुर स्टिल फुटबल क्लब कलकत्तालाई १–० ले हराउँदै थ्री स्टार उपाधि नजिक पुगेको थियो ।

निराजन बुढासुब्बा गोल्डकपका उत्कृष्ट खेलाडी

रुस्लान थ्री स्टारका मिडफिल्डर निराजन खड्काले आज सम्पन्न बुढासुब्बा रेडबुल गोल्डकप फुटबल प्रतियोगिताको उत्कृष्ट खेलाडीको उपाधि जितेका छन् । उनलाई २५ हजार नगद सहित यामाहाको मोटरसाईकल प्रदान गरिएको छ । उनले प्रतियोगिताभरी कुल तीन गोल पनि गरेका थिए ।

अन्य विधामा उत्कृष्ट खेलाडिहरुहरुलाई जनही २५ हजार रुपैया नगद पुरस्कार सहित ट्रफि प्रदान गरिएको छ :

उत्कृष्ट गोलकिपर – एलेन न्यौपाने (थ्री स्टार)

उत्कृष्ट डिफेन्डर – लवाल (थ्री स्टार)

उत्कृष्ट मिडफिल्डर – सुमन लामा (पुलिस)

उत्कृष्ट फरवार्ड – रेजिन सुब्बा (पुलिस)

उत्कृष्ट प्रशिक्षक – मेघराज केसी (थ्री स्टार)

उदयीमान खेलाडी – रोमन लिम्बु (धरान)