परराष्ट्रमन्त्री प्रदीप कुमार ज्ञवालीले हरेक राजनीतिक सामाजिक परिवर्तनको नेतृत्व गर्ने काठमाडौं कोरोना भाइरस महामारीविरुद्धको लडाईमा पछि परेको बताएको छ ।

आइतबार  मन्त्रिपरिषदको निर्णय सार्वजनिक गर्न आयोजित नियमित पत्रकार सम्मेलनमा मन्त्री ज्ञवालीले काठमाडौं देशलाई नै नमुना दिने, दृष्टान्त प्रस्तुत गर्ने शहर भएपनि कोरोना महामारीविरुद्धको लडाईंमा भने पछि परेको बताउनुभयो ।

उहाँले कोरोना महामारी नियन्त्रणका लागि कतिपय जिल्लाको प्रयास उदाहरणीय भएको तर, काठमाडौंको व्यवस्थापनमा भने गम्भीर चुनौती देखिएको बताउनुभयो ।

यसैबीच उहाँले काठमाडौंका जनप्रतिनिधि, संघ संस्था तथा आम नागरिकलाई कोरोना नियन्त्रणका लागि बाँके, कपिलवस्तु, वीरगञ्जजस्ता ठाउँमा अपनाइएको राम्रो अभ्यासबाट सिक्नुपर्ने बताउनुभयो ।

त्यस्तै, उहाँले ४० लाख जनसंख्या भएको काठमाडौंमा संक्रमण अनियन्त्रित बनेमा अवस्था भयावह हुने र स्वास्थ्य संरचनाले धान्न नसक्ने पनि बताउनुभयो । उहाँले कोरोना संक्रमणलाई हल्का ढंगले लिन नहुने पनि आग्रह गर्नुभयो ।

हालको अवस्थामा लकडाउन र निषेधाज्ञा गर्ने कुरा सरकारको प्राथमिकतामा नरहेको तर, नागरिक संवेदनशील नभएमा पुनः लकडाउन गर्न सरकार बाध्य हुने बताउनुभयो ।

नागरिकको जीवन रक्षा सरकारको मुख्य प्राथमिकता भएको बताउँदै उहाँले बारम्बारको अपीलले काम नगरे कडा कदम चाल्नुपर्ने अवस्था आउन सक्ने पनि सुझाउनुभयो ।