वडा प्रहरी कार्यालय बैदाममा कार्यरत इन्सपेक्टर ध्रुब शर्मा पक्राउ परेका छन् । श्रीमतीलाई जबर्जस्ती गर्भपतन गराएको आरोपमा शर्मा पक्राउ परेका हुन् ।

श्रीमतीले नै ईच्छा विपरित भ्रुण हत्या गरेको भन्दै जिल्ला प्रहरी कार्यालय म्याग्दीमा दिएको उजुरीपछि उनी पक्राउ परेका हुन् । जिल्ला प्रहरी कार्यालय, म्याग्दीमा छँदा सोही स्थानकी युवतीसँग विवाह गरेका शर्माले विवाह गरेको केही दिनपछि पर्वतकै एक स्वास्थ्य क्लिनिकमा गर्भपतन गराएको खुलेको छ । घटनास्थल कुस्मा बजार भएकाले छानबिनका लागि जिल्ला प्रहरी कार्यालय, पर्वतमा स्थानान्तरण भएको थियो ।

शर्माले म्याग्दीमै कार्यरत रहँदा विवाहको प्रलोभन देखाई शारिरीक सम्पर्कपछि गर्भ रहेको र बाध्यताले गरेको विवाहपछि जर्बजस्ती गर्भपतन गराउन लगाएको पीडित युवतीको उजुरीमा उल्लेख छ । अनुसन्धानका लागि शर्मालाई पर्वत जिल्ला अदालतबाट १० दिनको म्याद थप गरिएको जिल्ला प्रहरी कार्यालय पर्वतका डिएसपी विश्वराज अधिकारीले जानकारी दिए ।

पीडित युवती र प्रहरी निरीक्षक शर्माबीच प्रेममा रहेकै समयमा सम्बन्धमा खटपट आएको थियो । युवती गर्भवती भइसकेपछि शर्माले अर्कै युवतीसँग विवाहको तयारी गरेका थिए । शर्माले श्रीमानले आफूलाई अन्याय गरेको भनी सामाजिक सञ्जालमार्फत न्यायको अपिल समेत गर्दै आएकी छिन । मुद्धा दर्ता भएसँगै आवश्यक कानूनी प्रक्रिया अघि बढेको जिप्रका पर्वतले जनाएको छ । फौजदारी कसुरमा मुद्दा दर्ता भएसँगै शर्मा निलम्बनमा पर्ने कानूनी प्रावधान रहेको छ ।

चिनजानबाट प्रेम, शारीरिक सम्बन्ध हुँदै प्रेम विवाह गरेका शर्मा दम्पत्तिबीच पछिल्लो समय सम्बन्धमा खटपट आएको सामाजिक सञ्जालमार्फत सार्वजनिक भएको थियो । श्रीमानले आफूलाई जबर्जस्ती गर्भपतन गर्न लगाएको, विवाह पश्चात घरमा नलगेको, आफूलाई यातना दिने गरेको र सरुवा भएर गएपछि आफूसँगको सम्पर्क छुटाएर अलपत्र पार्ने काम गरेको भन्दै श्रीमतीले सामाजिक सञ्जालमा समेत लेख्दै आएकी छिन् । यसपछि नागरिक स्तरमै शर्मालाई किन कारबाही नगरिएको भनेर टिकाटिप्पणी भइरहेको थियो ।