पोखरा । राष्ट्रिय जनमोर्चाका गण्डकी प्रदेशसभा सदस्य कृष्ण थापाले आफू पोखरा छाडेर बागलुङ पुगेको जानकारी दिएका छन् । उनले आफूले कुनै हालतमा पनि काँग्रेसलाई सहयोग नगर्ने भएकाले हस्ताक्षर पनि नगरेको र आफूमाथि कारबाही सुरु गरिएको पनि पत्तो नभएको बताएका छन् ।

केही समय अघि मात्रै राष्ट्रिय जनमोर्चाले उनलाई संसदीय दलको नेताबाट हटाएको छ । अब सांसद पदबाट पनि हटाउन तयारी गरेको बुझिएको छ । उनलाई पदमुक्त नगरेको खण्डमा पार्टीको योजना सफल हुँदैन । अर्थात्, नेपाली काँग्रेसका कृष्ण चन्द्र नेपाली पोखरेलको नेतृत्वमा सरकार बन्दैन । थापालाई हटाएमा र सांसद खीम विक्रम शाही अन्तिम अवस्थासम्म पनि साथमा रहेमात्र अहिले विपक्षी गठबन्धनमा सरकार बन्छ ।

जनमोर्चाका केन्द्रीय महासचिव मनोज भट्ट दुई हप्तादेखि पोखरा छन् । उनले आफूले सांसद थापाले हस्ताक्षर गर्ने र २ बजे नै प्रदेश प्रमुखको कार्यालयमा लगेर बुझाउने बताएका थिए । तर, थापा बिहानै पोखरा छाडेको फोनमा बताउँछन् । उनले भने – म त ७ बजे नै पोखराबाट बागलुङ हिँडेको हुँ । ९ बजेतिरै आइपुग्याथेँ । अहिले आफ्नै घर जैमिनीमै छु ।

महासचिव भट्टले हस्ताक्षर हुन्छ भन्नुभएको छ, तपाईं पोखरामै लुकेको कि बागलुङ नै जानुभएको हो ? भन्ने प्रश्नमा उनले थपे – ‘कहाँ म हस्ताक्षर गर्छु ? मैले गरेको छैन । र मेरो हस्ताक्षर अरुले गर्न सक्लान्, त्यसो हुन दिन्न ।’ उनले आफूलाई कारबाही बारे थाहा नभएको बताए । थापाले भने – ‘खै यसबारे मलाई थाहा छैन । मलाई पैसा खाएको भन्ने आरोप छ रे, चुनौती दिन्छु ।’

हस्ताक्षर गर्न इन्कार गरेसँगै बिहान स्पष्टीकरण सोधेको राजमोले दिउँसो संसदीय दलको नेताबाट हटाएको हो ।

जनमोर्चाले सांसद थापालाई संसदीय दलको नेताबाट हटायो