पोखरा । गण्डकी प्रदेश सरकारका अर्थ मन्त्री रामजी प्रसाद बराल जीवनले समृद्धिको नाममा नेपालका ऐसिहासिक विषय वस्तुलाई भत्काउन तथा बिर्गान नपाइने बताए ।

पोखरा २३ स्थित चापाकोट पर्यटन प्रबद्र्धन समितिको आयोजना बिहीबार देखि सुरु भएको चापाकोट सांस्कृतिक महोत्सवको उद्घाटन गर्दै मन्त्री बरालले उक्त कुरा बताएका हुन् ।

नेपाली कला संस्कृति एवं ऐतिहासिक विषय वस्तुहरुको संरक्षण गर्नुपर्ने उनको भनाई थियो । पोखराको मुख्य बजार देखि चापाकोटको बाटो स्तरोन्नती गर्न विशेष पहल गर्ने मन्त्री बरालले बताए । सके यही आर्थिक वर्ष अन्यथा आगामी आर्थिक वर्षमा केही न केही देखिने गरी काम गर्ने मन्त्री बरालले वचन दिए । प्रदेश सरकारले पर्यटनलाई विकासको पहिलो पूर्वाधार विकासको रुपमा अघि बढाएकोले गाउँ–गाउँमा होमस्टेलाई प्रबद्र्धन गर्नुपर्ने मन्त्री बरालले बताए । बजारबाट टमटर, खुर्सानीसहितका फलफुल तरकारी होमस्टेमा लगेर खाने प्रवृत्तिको अन्त्य गर्नुपर्ने उनको भनाई थियो ।

स्थानियको मागअनुरुप आवश्यकताको आधारमा प्रदेश सरकारले सहयोग गर्ने मन्त्री बरालले बताए । माओबादी केन्द्रका नेता समेत रहेका मन्त्री बरालले एकात्मक राज्य प्रणालीका कारण सम्भावना भएका ठाँउमा विकास नभएको दाबी गरे । फेवाताल बचाउदै ताल परिवरीको क्षेत्रको विकास गर्नु पर्ने मन्त्री बरालको भनाई छ । पुष ५ गतेसम्म सञ्चाल नहुने उक्त महोत्सवको बिहीबार उद्घाटन गर्दै मन्त्री बरालले दीप प्रज्जवलनसहित चमराले पिङ खेलेर महोत्सवको उद्घाटन गरेका हुन् ।

कास्कीका प्रमुख जिल्ला अधिकारी जयनारायण आचार्यले चापाकोट होमस्टेमा बजारबाट ल्याएको कोक, र वियर भन्दा गाउँमा उत्पादन भएको दुध–दही जस्ता पदार्थको प्रबद्र्धन गर्न आग्रह गरे । पोखरा बजारमा रहेका होटलको भन्दा फरक खाना र सेवादिन सके होमस्टेबाट आर्थिक विकास हुने उनको भनाई थियो ।

पोखरा २३ का वडा अध्यक्ष बिष्णु प्रसाद पराजुलीले सडक बाटो स्तरोउन्नती र फेवाताल संरक्षण गर्नु पर्ने बताए । युवा व्यावसायी एवं वाईयूके सुपर मार्केटका सञ्चालक युवराज खतिवडाले उक्त महोत्सवमा एक लाख दिंदै उक्त महोत्सवलाई सफल पार्न सबैको साथ र सहयोग आवश्यक भएको बताए । पूर्व गाविस अध्यक्ष भेषराज पराजुलीले पोखराको मुख्यबजार देखि चापाकोट नजिक नभएर पनि सडकको कारण स्थानियले सास्ती भोग्नु परेको गुनासो गरे ।

स्थानिय शिवलाल पराजुलीले व्यक्तिगत २५ हजार सहितअन्य व्यक्तिहरुबाट संकलन गरेको एक लाख ७५ हजार महोत्सवलाई सहयोग गरेका छन् । समितिका अध्यक्ष एवं महोत्सव संयोजक भिम पराजुलीको अध्यक्षतामा सम्पन्न भएको उद्घाटन सत्रमा दोहोरी गित तथा पञ्चे बाजा एवं नृत्य समेत प्रस्तुतः गरिएको सचिव घनश्याम पराजुलीले बताए । महोत्सवमा चमराले पिङ, लिङ्गे पिङ, विभिन्न अर्गानीक खानाका परिकार उपलब्ध गराईएको सचिव पराजुलीले बताए । महोत्सवमा राष्ट्रिय तथा स्थानिय कलाकारबाट राष्ट्रिय दोहोरी गितप्रतियोगिता, भजन प्रतियोगिता लगायतका विभिन्न प्रतियोगिताहरु हुने भएको समितिले जनाएको छ ।