गण्डक न्युज पोखरा, ३० कात्तिक । नेकपा एमालेका केन्द्रिय सदस्य रविन्द्र अधिकारीले अब एमाले र माओवादीको बाम गठबन्धन काँग्रेसलाई हराउनका लागि नबनेको बताएका छन् । उनले लमजुङको चितीमा आयोजित वृहत आमसभामा बोल्दै काँग्रेस स्वतः पराजित हुने बताए ।

उनले भने – राणा, पञ्चायत, राजा पराजित गर्दै आयौं, अब पराजित गर्ने अभाव र गरिबीलाई हो । काँग्रेसलाई होईन । काँग्रेस त स्वतः पराजित हुन्छ । गरीबसँग विश्वेश्वर भनेपनि काँग्रेसले कहिल्यै गरिबी अन्त्य गर्न सकेन ।

https://www.facebook.com/Rabindra.Adhikari.UML/videos/1310261535744490/

अधिकारीले हाम्रो देश गरीब छ । समृद्धि गर्न सकेनौं । विकास गर्न सकेनौं । सानो आयोजना पनि पूरा हुन वर्षौं लाग्छ भन्दै देशको व्यवस्थाका कारण, हाम्रो व्यवहार, हाम्रो सोच यावत् कारणले यस्तो अवस्था आएकाले अब यसमा भुलेर बस्न नहुने बताए ।

उनले भने – नौ महिनामा प्रधानमन्त्री, ६ महिनामा मन्त्री फेरिन्छन् अनि कसरी परियोजना र विकासको काम अघि बढ्छ ? एउटाले नीति बनाउँछ, अर्को आउँछ, काम सुरु गर्नुभन्दा अगावै फालिदिन्छ ।

अधिकारी भन्छन्ः मनमोहन ९ महिना, प्रचण्ड ९ महिना, ओली ९ महिना । वामपन्थीलाई कहिल्यै टिक्न दिएनन् । हाम्रो पनि कारण छ । त्यसैले हामी एकजुट हुनुपर्ने अवस्था आएको हो । एमाले र माओवादीका लागि एक भएका होईनौं । राजनीतिक स्थिरता नभई देश विकास हुन्न । वैदेशिक हस्तक्षेप रोक्न सक्ने सरकार निर्माण गर्नुपर्छ । पाँच वर्ष स्थायी सरकार बन्नुपर्छ । पाँच वर्ष हेर्नुस्, काम नगरे हराउनुस् ।