श्यामशितल परियार, लमजुङ । नेपाल कम्युनिष्ट पार्टी (नेकपा)का प्रमुख सचेतक देवप्रसाद गुरुङले समाजवादी क्रान्तिका लागि औद्योगिक पूँजीको अनिवार्यता हुने बताए छन । नेपाल कम्युनिष्ट पार्टी (नेकपा) नगर संयन्त्र सुन्दरबजार लमजुङद्धारा शुक्रबार सुन्दरबजारमा आयोजित कार्यक्रममा बोल्दै उनले मुलुकमा औद्योगिक पूँजीको विकास गर्नु जरुरी रहेको उल्लेख गरेका हुन् ।

सामन्तवाद, दलाल र पूँजीवाद विस्थापित गर्न सकेमा मात्रै औद्यागिक पूँजीको विकास हुने उनले बताएका छन । ‘औद्यागिक पूँजीको विकास गर्न सकिएमात्रै समाजवादी क्रान्तिको आधारभूमी तयार हुन्छ,’ उनले थपे ।

एकाधिकार दलाल र पूँजीवाद विस्थापित गर्न सरकार, सदन र सडकमा सबै प्रकृयाबाट आफुहरुले पहल गर्न जरुरी रहेको उनले बताएका छन । ‘कम्युुनिष्टबीचको बृहत्तर रुपमा एकतावद्ध हुँदै कम्युनिष्टको नेतृत्वमा मात्रै यो कार्यभार पुरा गर्न हुनसक्छ । अरु विकल्पै छैन,’ प्रतिनिधिसभाका सदस्य समेत रहनुभएको गुरुङले भने ।

नेकपाका केन्द्रीय सदस्य एवम् प्रदेश सांसद मायानाथ अधिकारीले नेकपाले मात्रै देशको विकास गर्न सक्ने, मुलुको गरिबी हटाउन सक्ने दावी गरेका छन् । कार्यक्रममा नेकपाका नेता, कार्यकर्ताका साथै शुभेच्छुकहरुको उलेख्य सहभागिता रहेको थियो ।