घरायसी झगडाका कारण गत पुस १२ गते पोखरा १४ चाउथेकी शुशीला कार्की पोखराको गण्डकी मेडिकल कलेजमा भर्ना भईन् । उनलाई उनकै श्रीमान् रामबहादुर कार्कीले अस्पताल ल्याएका थिए । एक छिमेकीका अनुसार अघिल्लो रात रुँदै शुशिला उनको घरमा गईन् । उनका अनुसार श्रीमानले बारम्बार कुट्ने गरेको, थर्काउने गरेको र आफू मरेमा आफ्ना सन्तानलाई हेरिदिन उनले आग्रह गरेकी थिईन् ।

अस्पतालले प्यारालाईसिस भनेर केही समय भर्ना गरेर राख्यो । करिब २० दिन पछि शुशिला हल्का हिँड्न सक्ने भईन् । उनलाई थेरापीको लागि स्पर्श आयुवेद अस्पतालमा लगियो । शुशिलाकी आमा बाटुली पहारीका अनुसार आफूले छोरीलाई खाना खुलाएर घर पुग्दा ज्वाईंले छोरी मरेको खबर दिएको बताईन् । गत बिहीबार त्यस्तो अवस्थामा छोडेर आएकी छोरी कसरी एक्कासी मरिन् भन्दै उनले श्रीमान् राम बहादुरले अर्की बिहे गर्न घाँटी थिचेर मारेको समेत आरोप लगाईन् ।

शुशिलाको शव पश्चिमाञ्तल स्वास्थ्य बिज्ञान प्रतिष्ठानमा राखिएको छ । गाउँलेहरुले रिपोर्ट नआई शव नलाने अडान लिएका छन् । गाउँका महिला दिदीबहिनीहरुले अस्पताल नै घेरेका छन् भने रामबहादुरको धेरै महिलाहरुसंग सम्बन्ध रहेकाले अर्को बिहेको लागि आफ्नी श्रीमती मारेको आरोप लगाएका छन् ।