राष्ट्रिय टिमका पुर्व स्ट्राइकर अनिल गुरुङले ह्याट्रिक गरेपछि रुस्लान थ्री स्टार क्लब १७ औं संस्करणको आहा रारा गोल्डकप फुटबलको सेमिफाइनलमा प्रवेश गरेको छ । अनिल प्रेरित थ्री स्टारले सोमबार भएको तेस्रो क्वाटरफाइनलमा सिक्किम युनाइटेडलाई ५–२ गोल अन्तरले पराजित गर्याे ।

पोखरा रंगशालामा पहिलो हाफमा एक गोल गरेको थ्री स्टारले दोस्रो हाफमा चार गोल थप्यो । उसको जितमा पोखरेली स्ट्राइकर अनिलले ह्याट्रिक गरे । यस्तै, विदेशी खेलाडी अजयी मार्टिनले एक गोल गर्दा एक गोल आत्मघाती उपहार पायो । गत पुसमा सकिएको लिग अघि मनाङबाट थ्री स्टारमा अनुबन्धित भएका अनिलले जारी सिजनमा थ्री स्टारका लागि पहिलो गोल गरेका हुन् । ह्याट्रिक कर्ता अनिल नै खेलको म्यान अफ दि म्याच घोषित भए । उनले ५ हजार रुपैयाँ पाए ।

खेलको २६ औं मिनेटमा सुशील राईलाई फल गरेपछि पाएको पेनाल्टी सदुपयोग गर्दै अनिलले सुरुवाती अग्रता बनाए । खेलको ७० औं मिनेटमा मार्टिनले गोल गर्दै थ्री स्टारको अग्रता २-० को बनाए । सिक्किम युनाइटेडका डिफेन्डर र गोलरक्षकबीच तालमेल नमिल्दा मार्टिनले बल खोस्दै गोल गरे ।

खेलको ५१ मिनेटमा सिक्किमले आत्मघाती गोल गरेपछि थ्री स्टार ३-० ले अघि रह्यो । ८१ औं मिनेटमा अनिलले पेनाल्टीबाट व्यक्तिगत दोस्रो गोल गर्दा थ्री स्टारले ४-० को अग्रता बनायो । डिबक्सभित्र अनिललाई सिक्किमका खेलाडीले फल गरेपछि थ्री स्टारले पेनाल्टी पाएको थियो ।

यस्तै खेलको ८५ औं मिनेटमा डिबक्स नजिकैबाट गोल गर्दै अनिलले गृह नगरमा ह्याट्रिक पुरा गरे । योसंगै प्रतियोगितामा अनिल ह्याट्रिक गर्ने पहिलो खेलाडी बने । त्यसपछि खेलको अन्तिम मिनेटमा सिक्किमले दुइ गोल फर्कायाे । उसका साेनम छिरिङ भुटियाले खेलकेा ८९ मिनेटमा गाेल गरे । यस्तै अतिरत्त समयमा उपहार स्वरुप एक गाेल पायाे । थ्री स्टारका छिरिङ लाेप्चाङले अात्मघाति गाेल गरेका हुन् ।

भुटानमा जिग्मे दोर्जी बाङचुक स्मृति कपको उपविजेता भएको थ्री स्टार आहा राराको लागि सिधै पोखरा पुगको हो ।यसअघिको खेलमा विजयी हुँदै विभागीय एपीएफ र त्रिभुवन आर्मी क्लब सेमिफाइनल पुगिसकेका छन् ।

मंगलबारको अन्तिम क्वाटर फाइनल खेल नेपाल पुलिस र विदेशी टोली डफिन्स फेमिली क्लब क्यामरुनका बिच हुने भएको छ । सोमबार नै विभागीय टोली नेपाल पुलिस क्लबलाई सडन डेथमा ६-५ ले पराजित गर्दै क्यामरुनको दाउफिन्स फ्यामिलीले तिलोत्तोमा गोल्डकपको उपाधि जितेको छ । मंगलबार पोखराको मैदानमा पुलिसलाई यसको बदला लिने मौका मिलेको छ । तिलोत्तममा फाइनल खेलेको टीम भोलिपल्टै आहा रारा कपको पहिलो खेल खेल्न लागेका हुन् । यसअघि पोखरामा मनकामना कप र धरानमा बुढासुब्बा कप जितेको दाउफिन्सले लगातार तेस्रो उपाधि जितेको हो ।