पोखरा । पोखरा रातोपैह्रामा रहेको अन्तराष्ट्रिय पर्वतीय संग्रहालय अबदेखि दैनिक १० घण्टा सञ्चालनमा आएकोे छ । बिगतका समयमा ८ घण्टा मात्रै सञ्चालन हुने उक्त संग्रहालय आइतबारदेखि १० घण्टा सञ्चालनमा ल्याईएको हो ।

विश्वका बिभिन्न हिमाल र हिमाली समुदायको बारेमा प्रचारप्रसा गर्ने उदेश्यले बनाईएको उक्त संग्रहालय २०६१ साल माघ महिनादेखि सञ्चालनमा आएको थियो । संग्रहालय अवलोकनकर्ता बिगतका समयमा भन्दा बढ्न थालेपछि अवलोकन समय बढाईएको नेपाल पर्वतारोहण संघले जनाएको छ ।

बिगतमा बिहान ९ बजेदेखि साँझ ५ बजेसम्म खुल्ने उक्त संग्रहालय आइतबारदेखि भने बिहान आठ बजेदेखि साँझ ६ बजेसम्म सञ्चालनमा ल्याईएको छ ।  संग्रहालय अबलोकन समय दैनिक २ घण्टा थप गरेपछि आन्तरिक तथा बाह्य पर्यटकहरुको आगमनमा बुद्धि हुने संघले आशा गरेको छ ।

संग्रहालयमा हिमपहिरो, हिमालको उत्पत्ति, चट्टानलगायत हिमाली ठाउँका बासिन्दाकोे सामाजिक, सांस्कृतिक, धार्मिक एवम् आर्थिक क्रियाकलाप झल्काउने सामग्रीहरु अवलोकन गर्न सकिन्छ ।