अनुप पौडेल, पोखरा । उत्पादन मितिभन्दा एकदिन पहिल्यै बजारमा भेटिएको चाउचाउको उत्पादनकर्तालाई सचेत गराइएको छ । बागलुङ बसपार्क स्थित ‘शुभम् स्टीम चाउचाउ’ को उत्पादक कम्पनी फेमिली नुडल्सलाई कमीकमजोरी सुधार्न ५ दिनको म्याद दिइएको छ । यस विषयमा गत शुक्रबार शीर्षकमा बिगखबर डटकमले समाचार सार्वजनिक गरेको थियो ।

समाचार सार्वजनिक भएपछि जिल्ला प्रशासन कार्यालय कास्की, उपभोक्ता मञ्च कास्की, खाद्य प्रविधि तथा गुण नियन्त्रण डिभिजन कार्यालय पोखराको संयुक्त टोली अनुगमनका लागि सोमबार चाउचाउको फ्याक्ट्री खोज्दै पुगे । तर, न त चाउचाउ उद्योग थियो, न साइनबोर्ड नै थियो । घरको कोठामा भुईंमै चाउचाउ बनाएको भेटिएको उपभोक्ता मञ्च कास्कीका अध्यक्ष कपिलनाथ कोइरालाले जानकारी दिए । अनुगमनको क्रममा फेला परेका कमीकमजोरीलाई सुधार गर्न ५ दिनको म्याद दिईएको उनले बताए ।

अनुगमनको क्रममा विभिन्न सात विषयमा कमजोरी देखिएको खाद्य प्रविधि तथा गुण नियन्त्रण डिभिजन कार्यालय पोखराका प्रमुख प्रशान्त पोख्रेलले बताए । कम्पनीको ब्याच नम्बर राख्न, उद्योगको साईन बोर्ड राख्न, नविकरण गर्न, उत्पादन गर्ने मेसिन परिवर्तन गर्न, उत्पादन गर्दा भुइँ नभई टेबुलको प्रयोग गर्न, झिंगा, साङ्ला नियन्त्रण गर्न र एप्रोन, माक्ससँगै अन्य आवश्यक सामानको प्रयोग गर्न निर्देशन दिएको पोख्रेलले जानकारी दिए । निर्देशन अनुसार काम गरेको नपाए खाद्य ऐन बमोजिम कारबाही हुने उनले जनाए ।

संचालकले अटेरी गरेमा उद्योग बन्दसम्मको कारबाही हुन सक्नेछ । उद्योगका संचालकले निर्देशन अनुसार सबै मापदण्ड पुरा गर्ने प्रतिबद्धता जनाएका छन् । कम्पनी सञ्चालकले काम गर्ने भाइको गल्ती भनेपनि उनको कम्पनीमा कुनै कामदार नभएको र आफ्नै श्रीमती सहित आफै काम गर्ने मञ्चका अध्यक्ष कोइरालाले जानकारी दिए ।

गत शुक्रबार उत्पादन मिति भन्दा एक दिन अघि नै बजारमा सो कम्पनीको स्टीम चाउचाउ फेला परेको थियो । पोखरा नयाँबजार बस्ने सरु लामिछानेले चाउचाउ किनेर घरमा ल्याई प्याकेट खोल्दा उत्पादन मिति २०१९ अप्रिल १३ (२०७५ चैत ३०) गते लेखिएको थियो । तर उत्पादन मिति भन्दा एकदिन पहिला अर्थात् २०१९ अप्रिल १२ (२०७५ चैत २९) गते नै चाउचाउ बजारमा भेटिएको थियो ।

http://gandaknews.com/steam-noodles/