पोखरा :  परीक्षाको प्रतिफल न्यूनतम ‘डी प्लस’ नल्याउने बिद्यार्थीहरुलाई पोखरा विश्वविद्यालयले स्नातक तहमा भर्ना हुन नदिने भएको छ । विश्वविद्यालयको प्राज्ञिक परिषद् र कार्यकारी परिषद्ले शनिबार विज्ञप्ति प्रकाशित गर्दै कक्षा ११ र १२ मा एक वा एकभन्दा बढी विषयमा न्यूनतम ‘सी’ ग्रेड प्राप्त नगरेका विद्यार्थीहरुलाई चालु शैक्षिक सत्रमा रजिस्ट्रेसन नगर्ने जनाएको हो ।

विश्वविद्यालयले गरेको सो निर्णय कार्यान्वयन गर्न परीक्षा नियन्त्रण कार्यालयलाई निर्देशन दिएको छ ।‘विश्वविद्यालय प्राज्ञिक परिषद्को निर्णय अवज्ञा गरेका कारण विश्वविद्यालयको शैक्षिक वातावरण र साख धमिल्याउने काम हुन गएको छ,’ विज्ञप्तीमा भनिएको छ, ‘विश्वविद्यालयको नीति, नियमको पुनः उल्लंघन गरेमा नियमअनुसार ती कलेजको सम्बन्धन समेत खारेज हुन सक्नेछ ।’ चारवटै संकायअन्तर्गत स्नातक तहका सम्पूर्ण विषयको रोकिएको परीक्षा सञ्चालनका लागि सहज वातावरण बनाउन विश्वविद्यालयले आह्वान गरेको छ ।