पोखरा, १३ जेठ । जिल्ला प्रहरी कार्यालय कास्कीका प्रमुख ओमबहादुर रानाको सरुवा भएको छ । १३ महिनापछि रानाको प्रहरी प्रधान कार्यालय, जनसम्पर्क तथा प्रचारप्रसार शाखामा सरुवा भएको हो । प्रहरी प्रधान कार्यालयले आइतबार ४५ जना प्रहरी उपरीक्षक (एसपी) को सरुवा गरेसँगै कास्कीमा पनि एसपी फेरिएका हुन् । अघिल्लो बर्षको बैशाख अन्तिम साता राना कास्की आएका थिए । कास्कीको नयाँ प्रमुखको रुपमा दानबहादुर कार्की आउने भएका छन् । उनी हाल प्रहरी प्रधान कार्यालय, महानिरीक्षकको सचिवालयमा कार्यरत छन् । गुल्मी घर भएका कार्की प्रहरी प्रधान कार्यालयमा कार्यरत थिए ।

राना डिएसपी हुँदैमा रसुवा रक्तचन्दन काण्डमा बदनाम भएका थिए । उनीसँगै आरोप लागेका सैनिकका अधिकारी त जागिरबाटै बर्खास्त भएकोमा उनी भने चोखिए । कास्कीमा आउँदैमा टोले गुण्डाहरुको स्कर्टिङ र सुरक्षा भएपछि उनको आलोचना यहाँ पनि सुरु भयो । डिस्कोतिर रातिराति भेटिने भनेर पनि आलोचित बने । तर, कास्की सिल्दुजुरे घर भई नयाँबजारमा बस्दै रहेका सूर्य पाण्डेको चार वर्ष अघि शिवरात्रीको दिन हत्या भएकोमा यसअघिका ३ एसपीले गर्न नसकेको काम उनकै नेतृत्वमा भयो । रुँदै भौतारिरहेकी बृद्धा आमाले थोरै भएपनि शान्तिको श्वास फेर्न पाईन् ।

पोखरा २२ पुम्दी भुम्दीकी श्रीया बिकको हत्यारालाई २४ घन्टा नपुग्दै पक्राउ गरेपछि रानाले नेतृत्व गरेको कास्की प्रहरीको चर्चा चुलियो । यो पनि उनको लागि प्लस प्वाईन्ट बन्यो ।

तर लामाचौरको पुष्पा केसीको बलात्कार पछि हत्याको आशंका अझै कायमै छ, यसमा कास्की प्रहरीको प्रगति छैन । दानबहादुर कार्कीको अबको कार्यकाल कस्तो हुनेछ ? हेर्न बाँकी नै छ ।

४५ एसपीको सरुवा गर्दा १८ जिल्लाका प्रहरी प्रमुख फेरिएका छन् । सरुवा सूची अनुसार पर्सामा सोमेन्द्रसिंह राठौर, चितवनमा दानबहादुर मल्ल, मोरङमा विश्व अधिकरी, भक्तपुरमा सविन प्रधान तथा काभ्रेमा जयराज सापकोटाको सरुवा भएको छ ।

सिरहामा उमाप्रसाद चतुर्वेदी, कैलालीमा सुदीप गिरी, उदयपुरमा वीरबहादुर बुढामगर, सप्तरीमा मनोजकुमार यादव, नवलपरासीमा मोहन पोख्रेल, सुनसरीमा यज्ञविनोद पोखरेल, बर्दियामा राजेश बास्तोला, नवलपरासी (पश्चिम)मा लालमणि आचार्य, पाल्पामा श्यामकृष्ण अधिकारी, धनकुटामा सुदर्शन कोइराला, इलाममा हिराबहादुर पाण्डेको सरुवा भएको छ ।