पोखरा– गण्डकी प्रदेशसभामा सोमबार बसेको बैठकले तेस्रोपटक प्रदेशसभा नियमावली संशोधन गर्दै सांसदहरुले अबदेखि मोबाइल हेरेर संसदमा बोल्न पाउने व्यवस्था थप गरेको छ । प्रदेशसभा नियमावली १९ ‘झ’ ले बैठक कक्षमा मोबाइल फोन र अन्य विद्युतीय उपकरण प्रयोग गर्न नहुने व्यवस्थालाई संशोधन गर्दै अबदेखि मोबाइल हेरेर बोल्न पाउने व्यवस्था थप गरेको हो ।

नियमावली संशोधन मस्र्यौदा समितिका सदस्य कुमार खड्काका अनुसार स्मार्ट तरिकाले सांसदहरु प्रस्तुत हुने क्रम बढेकाले तेस्रोपटक नियम संसोधन गरेर यस्तो व्यवस्था ल्याइएको हो । सांसदहरुले मोबाइलमै आफ्ना कुराहरु ल्याएर बोल्न खोजेको पाइएकाले पनि नियमावली संशोधन गरिएको उनले बताए ।

संघीय सरकारले भने सदनमा सांसदहरुले फोनमा कुरा गर्न र रेकर्ड गर्न बर्जित गरेको छ । यस्तै, सांसदहरुले बैठक कक्ष बाहिर राखिएको हाजिरी खातामा बैठक सुरु हुनुभन्दा एक घन्टाअघि उपस्थिति जनाई सक्नुपर्ने व्यवस्था थप गरेको छ ।