पोखरा । सरकारी अड्डामा निवेदन दिन पनि झण्झट ब्यहोर्नुपर्ने गुनासो अधिकांशको छ । सेवाग्राहीले बडो सकस खेप्नुपर्छ । सरकारी कार्यालयले निःशुल्क फाराम र सेवा भनिरहँदा कार्यालय अगाडि सेवाग्राही चर्को मुल्य तिर्न बाध्य छन् । बिचौलियाको बिगबिगी छ । जिल्ला प्रहरी कार्यालय कास्कीले आफू मातहतका सबै प्रहरी कार्यालयमा अब देखि कुनै पनि निवेदन बुझ्दा, उजुरी/जाहेरी लिँदा हुलाक टिकट आवश्यक नपर्ने गरी सूचना प्रदान गर्न परिपत्र गरेको छ । कार्यालयका प्रमुख एसपी दानबहादुर कार्कीले ठाडो आदेश दिँदै प्रहरीकहाँ पीडित पक्ष नै आउने भएकाले उनीहरुलाई दुःख हुने गरी हुलाक टिकट अनिवार्य नगर्न आदेश दिएका हुन् ।

उसो त कानुनी सेवा दिने भनेर बसेकाहरुले निवेदन र जाहेरी लेखेको मनपरी रकम लिने गरेको गुनासो सेवाग्राहीले गरिरहेका छन् । त्यसैमाथि १० रुपैंयाको टिकट भएपनि टाँस्नै पर्ने बाध्यता बनाउँदा समय र पैसाको नाश हुने एसपी कार्कीले बताए । ‘हामीकहाँ आउने कोहि कोहि यति तिर्न सक्ने क्षमताका पनि हुँदैनन् । त्यसमाथि टिकट खोज्न भौतारिनुपर्ने ?’ एसपी कार्कीले गण्डकन्यूजसँग भने – ‘चाहिने ठाउँमा अनिवार्य रहन्छछ । तर, यहाँ निवेदन, उजुरी जाहेरीमा यो आवश्यक छैन भनेरै आफू अन्तर्गतका सबै कार्यालयहरुमा परिपत्र गरेको छु ।’ उनले प्रहरी कार्यालयमा आउँदा टिकट नटाँसी आउन सबैलाई आग्रह गरेका छन् ।

प्रहरी संगठनमा स्वच्छ र क्षमतावान् अधिकृतका रुपमा छवि बनाएका कार्कीको हालसम्मको कमाण्ड र गतिविधि हेर्दा उनको काममा खोट लगाउने ठाउँ देखिएको छैन । उनले कास्कीको कमाण्ड सम्हालेपछि प्रहरीको आचरण सुधारमा विशेष ध्यान दिएका छन् । समुदायले चाहेको प्रहरी बनाउने अभियानमा आफू रहेको उनको भनाई छ । प्रहरीले ड्युटी गर्दा आदर गर्नुपर्ने, चेकजाँच कडा बनाउनुपर्ने, गलत कामकारबाही नगर्ने, हुन नदिनेतर्फ एसपी सचेत रहेको प्रहरीका जुनियर अधिकृतहरु नै बताउँछन् ।

प्रहरी प्रवक्ता डिएसपी राजकुमार केसीले कास्की कास्की प्रहरी नागरिकसँग समिपमा रहेर काम गर्न चाहेको बताए । प्रहरीको सेवा आवश्यक परेको ठाउँमा पूर्ण विश्वासका साथ सम्झिएर सम्पर्क गर्न उनको अनुरोध छ ।