पोखरा पृथ्वीचोक स्थित पश्चिमाञ्चल सामुदायिक अस्पतालमा सुत्केरीको मृत्यु भएपछि तनाव बढेको छ । अस्पतालको लापरवाहीले गर्दा सुत्केरीको मृत्यु भएको भन्दै आफन्त आक्रोशित छन् ।  बिहिवार बिहान कास्की अन्नपूर्ण गाउँपालिका घर भइ पोखरा चाउथे बस्दै आएकी ३३ वर्षीय निशा कुमारी थापाको मृत्यु भएको थियो ।

सामान्य रुपमा सुत्केरी भएकी निशाको उच्च रक्तस्राव भएपछि ज्यान गएको हो । रगत नथामिएपछि आफूले सिस्टर (नर्स) लाई भन्दा पनि वास्ता नगरेको र यसमा डाक्टर, अस्पताल कोहि पनि जिम्मेवार नबनेको कुरुवा बसेकी निशाकी बहिनी तारा थापा मगरले बताइन् । ‘बच्चा सामान्य रुपमा नै जन्मियो, रगत धेरै बगेर नर्सलाइ खबर गर्दा अलि अलि हुन्छ भन्दै वास्ता गरेनन् । पछि रक्तस्राव बढ्दै जाँदा समेत वास्ता गरेनन् । दिदीको यो हालत बनाए ।’ ताराले भनिन् ।

उनका अनुसार अहिले पीडित पक्ष र अस्पताल प्रशासनबीच वार्ता भइरहेको छ । आक्रोशित भिडले ढुङ्गा प्रहार गर्न थालेपछि बाक्लो मात्रामा प्रहरी तैनाथ गरिएको छ । ड्युटिमा रहेका कर्मचारीलाई समेत ल्याउन पर्ने भन्दै उनीहरुले नाराबाजी गरिरहेका छन् । यस अस्पताल सामुदायिक नाम भएपनि निजी अस्पताल नै हो । जहाँ प्राइभेट हस्पिटल झैं महंगो छ ।

तस्विरः सुरेश सुनार