पोखरा । बागलुङको तमानखोला गाउँपालिका–४ लाम्मेलामा गए राति गएको पहिरोमा परी तीन जनाको मृत्यु भएको छ । स्थानीय ओमबहादुर श्रीपालीकी ४५ वर्षीया श्रीमती पञ्चकुमारी, देवेन्द श्रीपालीकी ७० वर्षीया आमा असारी र १२ वर्षीय छोरा प्रवीण श्रीपालीको मृत्यु भएको प्रहरीले जनाएको छ ।

पहिरोमा परी सात जना घाइते भएका छन् । सो पहिरोमा परी गमबहादुर श्रीपालीकी श्रीमती वर्ष ३४ की सुनिता श्रीपाली, छोराहरु बर्ष १६ को अनिल श्रीपाली, वर्ष ९ को राम श्रीपाली र वर्ष ५ को कमल श्रीपाली घाईते भएको प्रहरीले जनाएको छ ।

घाइतेमध्ये ओमबहादुर श्रीपालीको अवस्था गम्भीर रहेको प्रहरीले जनाएको छ । पहिरोमा देबेन्द्र श्रीपालीका दुई घरहरु भत्किएका छन् भने श्रीमती वर्ष ४० की चित्रदेवी श्रीपाली घाईते भएकी छन् । पहिरोमा परी केहि भैँसी, बाख्रा र कुखुराहरु पनि मरेको प्रहरीले जनाएको छ ।

१५० मिटरमाथिबाट खसेको पहिरोले ५ घर पुरिएको वडाध्यक्ष उदिन छन्त्यालले बताए । पहिरोले पशु चौपायासहित भौतिक सम्पत्तिमा ठूलोे क्षति पुगेको छ । क्षतिको यकिन विवरण आउन समय लाग्ने प्रहरीको भनाइ छ । अहिले पनि वर्षा भइरहेकाले उद्धार तथा राहतमा कठिनाइ भइरहेको छ । उद्धारमा प्रहरी, जनप्रतिनिधिसहित स्थानीयवासी खटिएका छन् ।