पोखराका नहरहरु असुरक्षित छन् । न तारजाली न त माथि स्ल्याब (ढकनी) । बालबालिका मात्र हैन प्रौढ उमेरका व्यक्तिहरुले समेत ज्यान गुमाइरहेको उदाहरण हामीसँग छ । पोखरामा आइतबार एक बालिकाको घर नजिकैको नहरमा परी ज्यान गएको छ ।

पोखरा ५ मालेपाटनकी इन्दिरा सुवेदीले धराप नहरकै कारण आफ्नी ४ वर्षीया छोरी गुमाएकी छिन् । अघि साढे ६ बजेको समयमा घर नजिकै आमासँगै खेल्दै गरेकी सिर्जना सिधै नहरमा खसेकी हुन् । गहिरो र पानी भएको नहरमा खसेकी सिर्जना ७ बजेर ४० मिनेट जाँदा मात्र फेला प¥यो । तर, उनको मृत्यु भइसकेको थियो ।

स्थानीयका अनुसार नहरमाथि स्ल्याब ग्याप थियो र त्यहाँ कार्टुन थियो । बच्चा सिधै कार्टुनमा टेक्दा खसेको स्थानीयको भनाई उदृत गर्दै प्रहरीले जनाएको छ । वडा प्रहरी कार्यालय बैदामका प्रमुख डिएसपी यादव ढकालका अनुसार घटना पश्चात वडा सहित जिल्ला, सशस्त्र प्रहरी र स्थानीयले खोजी कार्य सुरु गरेका थिए । १५० मिटर तलतिर बागवानी नजिकै उनको शव अड्केको अवस्थामा भेटिएको डिएसपी ढकालले जनाए ।

नहरमाथि पूरा स्ल्याब वा तारबार नभएरै घटना भयोः डिएसपी ढकाल

डिएसपी ढकालले स्ल्याब ठाउँ ठाउँमा नहुँदा नहर जोखिम बनेको बताए । उनले स्ल्याब ग्याप नहुने र तारबारको व्यवस्था भए यो जोखिम टर्ने उल्लेख गरे । ‘स्ल्याब कि छँदै छैन भने पहिल्यै सतर्कता अपनाईन्छ । तर स्ल्याब भएको नहरमा कहिँ खाली ठाउँ भयो भने त्यो धराप नै हुन्छ । यसले धेरै दुर्घटना निम्तिएको देखेको छु ।’ डिएसपी ढकालले भने ।

गत २०७५ चैत २७ गते संगीतकर्मी श्रीमान थुलुङ पनि स्कुटर दुर्घटनापछि उछिट्टिएर नहरमा पर्दा निधन भएको थियो । यस्तै लेखनाथमा पनि गत वर्ष नै एक बालकको डुबेर ज्यान गएको थियो ।

तस्विरः अशोक खड्का