पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) मा एक पुरुषको मृत्यु भएको छ । स्याङ्जा फेदीखोला गाउँपालिका खहरे घर भएका ति ५१ वर्षीय पुरुषको अस्पतालको आकस्मिक कक्षमा उपचार गर्ने क्रममा आइतबार बेलुका नै मृत्यु भएको हो ।

भारतबाट नेपाल आएर क्वारेन्टिनमा बसेका उनको कोरोना जाँच गर्दा पीसीआर रिपोर्ट नेगेटिभ आएको थियो । त्यसपछि उनी घर फर्किएका थिए । आइतबार एक्कासी बेहोस भएपछि बेहोसी अवस्थामै उनलाई अस्पताल ल्याइएकोमा बेलुकी नै मृत्यु भएको अस्पतालले जनाएको छ ।

अस्पतालमा भर्ना हुँदा स्याङ्जाको स्थानीय भनेर भनेकाले स्वास्थ्यकर्मीले कोरोना हुनसक्ने आशंका नगरेको र पीपीई समेत नलगाई अन्य बिरामी सरह उपचारमा खटिएकाले भारतबाट आएको थाहा भएपछि उपचारमा खटिएका स्वास्थ्यकर्मी त्रासमा छन् । अस्पतालका निर्देशक डा. अर्जुन आचार्यले भने जनप्रतिनिधि आफ्नै गाडीमा राखेर ल्याएको, पीसीआर रिपोर्ट नेगेटिभ आइसकेकाले डराउनुपर्ने कारण केही नरहेको जनाए ।

मृतक व्यक्तिको पुनः कोरोना परीक्षणका लागि स्वाब संकलन गरिएको छ । यद्यपी, विरामी मुटुरोगी भएको पनि खुलेको छ ।

पोखरा स्वास्थ्य विज्ञान प्रतिष्ठानलाई प्रदेशकै प्रमुख कोरोना विशेष अस्पताल बनाइएको छ । तर, कोरोना बाहेकका अन्य बिरामीको उपचार, ल्याबका कामहरु पनि सँगै भइरहेकाले जनस्तरमा कोरोनाका बिरामीका लागि छुट्टै ठाउँको व्यवस्था हुनुपर्ने माग जोडदार रुपमा गण्डकी सरकारसमक्ष गरिरहेका छन् ।