पोखरा । गण्डकी प्रदेशको स्याङ्जा र पर्वत जिल्लामा म‌ंगलबार बिहान नयाँ १० जना काेराेना संक्रमित थपिएका छन् ।

स्वास्थ्य निर्देशनालय गण्डकीका अनुसार स्याङ्जामा ५ जना थपिएका छन । त्यस्तै पर्वत जिल्लामा पहिलाेपटक ५ जनामा कोरोना संक्रमण देखिएकाे छ ।

स्याङ्जाको चापाकोट नगरपालिका ठेगाना भई सोहि नगरपालिका स्थित क्वारेन्टाइनमा रहेका वर्ष २२, २६, ३२ र ४० का ४ जना पुरुष र स्याङ्जा कै बिरुवा गाउँपालिका ठेगाना भइ सोहि गाउँपालिका स्थित क्वारेन्टाइनमा रहेका वर्ष २० का १ जना पुरुष गरि स्याङ्जा जिल्लामा थप ५ जनामा कोरोना संक्रमणको पुष्टि भएको छ ।

त्यस्तै पर्बत जिल्लाको फलेबास नगरपालिका ठेगाना भई कुश्मा नगरपालिका स्थित क्वारेन्टाइनमा रहेका वर्ष २० र ४० का २ जना पुरुष र सोहि जिल्ला महाशिला गाउँपालिका ठेगाना भई कुश्मा नगरपालिका स्थित क्वारेन्टाइनमा रहेका वर्ष १९, २० र २१ का ३ जना पुरुषमा समेत गरि पर्बत जिल्लामा ५ जनामा कोरोना संक्रमणको पुष्टि भएको छ ।

संक्रमितहरुलाई सम्बन्धित जिल्ला अस्पतालको आईसोलेसनमा लैजाने तयारी भैरहेको स्वास्थ्य निर्देशनालय गण्डकीका निर्देशक डा. विनोद विन्दु शर्माले बताए ।

योसंगै गण्डकी प्रदेशमा कोरोना संक्रमितको संख्या ३७ पुगेको छ ।