तनहुँँ । पृथ्वीराजमार्गको आँबुखैरेनी-मुग्लिन सडकखण्ड अन्तर्गत पर्ने ऐना पहरामा पहिरो खसेको छ । सुक्खा पहिरोका कारण तनहुँको आँबुखैरेनी गाउँपालिका–२ स्थित ऐना पहरा नजिकै सोमबार रातिदेखि पहिरो जाँदा उक्त राजमार्ग अवरुद्ध भएको हो ।

राजमार्ग अवरुद्ध भएपछि सयौँ सवारी साधन रोकिएका छन् । बिहान देखि आँबुखैरेनी-मुग्लिन सडकखण्ड अबरुद्ध बनेछी हजारौं यात्रुहरु अलपत्र परेका छन् ।

ऐना पहरा नजिकै सडकमाथिबाट खसेको पहिरो हटाउने कार्य सुरु भएको छ । सडक माथिबाट निरन्तर ढुंगा खसिरहेकोले सडकबाट पहिरो हटाउन समस्या भएको थियो ।

बिहान साढे ६ बजे खसेको पहिरोको कारण पूर्ण रुपले अवरुद्ध बनेको आँबुखैरेनी-मुग्लिन सडकखण्डमा मुग्लिन र डुम्रेबाट आएको डोजरले पहिरो हटाउने कार्य सुरु गरेको इलाका प्रहरी कार्यालय आँबुखैरेनीले जानकारी दिएको छ ।

प्रहरीले पहिरो हटाउन अझैं ३ देखि ४ घण्टा लाग्ने बताएपनि ढुंगा नखस्ने हो भने सो समय भन्दा छिटो पहिरो हटाउन सकिने डोजर चालकले बताएका छन् ।

पहिरो हटाउन समय लाग्ने देखिएको प्रहरीले जनाएको छ । वर्षा सुरु भएसँगै ठाउँ–ठाउँमा पहिरो गएर बाटो अबरुद्ध हुन सुरु भएको छ ।