पोखरामा एकै दिन दुई जनाको कोरोना संक्रमणबाट मृत्यु पुष्टि भएको छ । पोखरा महानगरपालिका वडा नं. १६ दीपका ८७ बर्षिय कोरोना संक्रमितको मंगलबार पूर्वान्ह मृत्यु भएको छ ।

पोखरा स्वास्थ्य विज्ञान प्रतिष्ठानले तत्काल विज्ञप्ती जारी गर्दै उपचारका क्रममा बिहान १०ः ४० मा मृत्यु भएको पुष्टी गरेको हो । साउन ३२ गते उच्च ज्वरो र स्वास्व प्रश्वासमा समस्या भई उपचारका लागि सोमबार पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) मा भर्ना गरिएको थियो । उनमा मृगौला रोग, मधुमेह रोग रहेको प्रतिष्ठानका निर्देशक डा. अर्जुन आचार्यले जानकारी दिएका छन् । अस्पतालमा मृत्यु हुने उनी चौथो व्यक्ति रहेको डा. आचार्यले बताए ।

उनमा पहिल्यै कोरोना पुष्टि भएको थियो । तर, अर्का मृतकको भने मृत्युपछि कोरोना पुष्टि भएको हो । तनहुँ १ ब्यास अम्रेनीकी ५० वर्षीया महिला पोखरा १२ हस्पिटोलचोक स्थित कास्की सेवा हस्पिटलमा उपचाररत रहेकीमा सोमबार राति ११ः३६ बजे मृत्यु भएको थियो । उनको मंगलबार मात्र कोरोना पुष्टि गरिएको थियो । हेपाटाइटिस, नेमोनिया, सुगर प्रेसर, मुटुको रोग लगायतका दीर्घ रोगबाट ग्रसित थिइन् ।

तस्वीरः स्वास्थ्य निर्देशनालय, गण्डकी प्रदेश

यसैबीच, पोखरा महानगरमा कोरोनाबाट ज्यान जानेको संख्या २ पुगेको छ । यसअघि साउन २४ गते राति पोखरा १९ लामाचौरका ६२ वर्षीय बृद्धको ज्यान गएको थियो ।

गण्डकीमा मृतको संख्या ७ पुगेको निर्देशनालयले जनाएको छ । तर, स्वास्थ्य मन्त्रालयको नियमित मिडिया व्रिफिङको क्रममा मृत्यु अपडेट गर्दा गण्डकीमा मृतक संख्या ६ रहेको जनाएको छ । यसहिसाबले पोखरामा आज थपिएका २ सहित गण्डकीमा ८ हुन आउँछ ।