तनहुँ । तनहुँका थप १० जनामा कोरोना संक्रमण पुष्टि भएको छ ।

जिल्लाको म्याग्दे गाउँपालिकाका ८ जना, भानु नगरपालिकाका १ र देवघाट गाउँपालिकाका १ जनामा कोरोना संक्रमण पुष्टि भएको हो ।

म्याग्दे गाउँपालिकाको वडा नम्बर ४, ६ र ७ का ८ जनामा कोरोना पुष्टि भएको स्वास्थ्य निर्देशनालय गण्डकीले जनाएको छ ।

म्याग्दे गाउँपालिका–४ का ३४, ६२, म्याग्दे गाउँपालिका–६ का ५८, ५३, म्याग्दे गाउँपालिका–७ का ३५ र ३७ वर्षीय पुरुष, एक वर्षीय बालक र ३१ वर्षीया महिलामा कोरोना पुष्टि भएको छ ।

कोरोना पुष्टि हुनेमध्ये एक जना प्रहरी, ६ जना भारतबाट आएर होम क्वारेन्टिनमा बसेका र एक जना म्याग्दे गाउँपालिका–७ घर भई हाल व्यास नगरपालिका–३ शान्तिनगर बस्ने पुरुष रहेको म्याग्दे गाउँपालिकाका प्रमुख प्रशासकीय अधिकृत हरि नागिलाले जानकारी दिए ।

गाउँपालिकाले गत भदौ ८ गते १४५ जनाको स्वाब सङ्कलन गरी परीक्षणका लागि पोखरा पठाएको थियो ।

त्यस्तै भानु नगरपालिका वडा नम्बर ४ का ५० वर्षीय पुरुषमा समेत संक्रमण पुष्टि भएको छ ।

स्थायी ठेगाना भानु-४ भएपनि स्वाब भानु नगरपालिकाबाट नपठाइएको भानु नगरपालिकाका स्वास्थ्य शाखा प्रमुख ऐश्वर्यचन्द्र भट्टराईले जानकारी दिए ।

‘हामीले पठाएको स्वाब होईन ।’ प्रमुख भट्टराईले भने ‘पोखरा मै स्वाब दिएर बसाई उतै(पोखरा) नै रहेकोे र बैंकका कर्मचारी भन्ने प्रारम्भिक जानकारी आएको छ ।’ उनले अगाडि भने ‘के कसो भनेर हामी बुझ्दै छौ ।

यस्तै देवघाट गाउँपालिका वडा नम्बर ५ निवासी ५१ वर्षीय पुरुषलाई समेत कोरोना संक्रमण पुष्टि भएको छ ।

गाउँपालिकाले होम क्वारेन्टिन, क्वारेन्टिन र कन्ट्याक्ट ट्रेसिङबाट गत भदौ ७ गते २५ जनाको स्वाब संकलन गरी पीसीआर परीक्षणका लागि भरतपुर कोरोना अस्पतालको प्रयोगशालामा पठाएको थियो ।

बुधबार प्राप्त रिपोर्ट अनुसार २४ जनाको पीसीआर रिपोर्ट नेगेटिभ र १ जना पुरुषको रिपोर्ट पोजेटिभ आएको गाउँपालिकाका स्वास्थ्य शाखा प्रमुख प्रदिप कुमार बुढाथोकीले जानकारी दिए ।

उनले भने ‘अहिले गाउँपालिका भित्र २ जना सक्रिय संक्रमित रहेको छ ।’