पोखरा घारीपाटन स्थित हिमालय आँखा अस्पतालका लेखा अधिकृत वामदेव सुवेदी पक्राउ परेका छन् । अस्पतालमा कार्यरत महिलाहरुले सुवेदी विरुद्ध करणीसम्बन्धी कसुरमा जाहेरी दिएपछि मंगलबार उनलाई पक्राउ गरिएको जिल्ला प्रहरी कार्यालय कास्कीका प्रवक्ता तथा डिएसपी सुवास हमालले जानकारी दिए ।

ति ३५ वर्षीया महिलाले पहिले प्रहरीकहाँ लिखित जाहेरी दिएकी थिइनन् । मंगलबार प्रहरीकहाँ उनीसहित अर्की एक महिलाले पनि सुवेदीविरुद्ध जाहेरी दिएपछि सुवेदीलाई मासबारस्थित निवासबाटै पक्राउ गरिएको प्रहरीले जनाएको छ ।

लेखा अधिकृत सुवेदीबाट पटकपटक यौन शोषण भएको भन्दै अस्पतालकी महिला कर्मचारीले भदौ १७ गते अस्पतालकै कर्मचारी युनियनमा कारबाहीको माग गर्दै निवेदन दिएकी थिइन् । त्यसपछि, अन्य महिलाहरुले पनि आफूहरु सुवेदीबाट पीडित बनेको आरोप लगाएको थिए । दुई दिनपछि नै लेखा अधिकृत सुवेदी निलम्बित भएका थिए ।

लेखा अधिकृत सुवेदीले विगत ४ वर्षदेखि यौन शोषण गरेको आरोप छ । हिमालय आँखा अस्पतालमा कार्यरत सबै ७२ जना कर्मचारीले हस्ताक्षर गरेर युनियन मार्फत व्यवस्थापन समितिलाई ३ बुँदे माग गर्दै पत्र बुझाएपछि व्यवस्थापन थप दबाबमा परेको थियो । पत्र पाए लगत्तै व्यवसापन समितिको बैठक बसी २० गते नै सुवेदीलाई निलम्बन गरिसकेको थियो ।

उसो त, व्यवस्थापन पक्ष पनि सुवेदीलाई जोगाउने पक्षमा भने होइन । महिलाले नै प्रहरीकहाँ लिखित उजुरी नदिएपछि सुवेदी पक्राउ परेका थिएनन् । महिलाहरु जब प्रहरी कार्यालयमा पुगे, सुवेदी मंगलबार नै पक्राउ परिसके । समितिले घटना छानविन गर्नका लागि ३ सदस्यीय छानविन समिति समेत गठन गरेको छ ।