तनहुँ । तनहुँको भिमाद नगरपालिकामा कोरोना संक्रमण र कन्ट्याक ट्रेसिङमा परेका सबै कार्यालय बन्द हुने भएका छन् ।

आइतबार नगरपालिकाले गरेको उक्त निर्णय कोरोना नियन्त्रणका लागी भएको नगरपालिकाका निमित्त प्रशासकीय अधिकृत पदमराज आचार्यले जानकारी दिए ।

भिमाद नगरपालिकामा कोरोनाको संक्रमण बढ्दै गएको र नगरपालिकामा कार्यरत कर्मचारीमा समेत कोरोना संक्रमण भएको हुँदा कन्ट्याक ट्रेसिङ गर्नुपर्ने भएकाले कार्तिक २३ गते ३ बजे दिउँसोदेखि कार्तिक २६ गते राति १२ बजेसम्म भिमाद नगरपालिकाबाट प्रवाह हुने अत्यावश्यक बाहेक अन्य सबै सेवा बन्द रहने नगरपालिकाले जनाएको छ ।

पिसीआर परीक्षण नतिजा नआएसम्म त्यस्ता सबै कार्यालय, व्यवसाय गर्ने पसल एवं व्यक्तिका घरहरु पूर्ण रुपमा बन्द गराउने निर्णय भएको आचार्यले बताए ।

नगरबासीलाई अत्यावश्यक बाहेक घर बाहिर नहिड्न अनुरोध गरेको छ । साथै बिदाको समयमा घुमघाम नगर्न नगरपालिकाले अनुरोध गरेको छ । दैनिक रुपमा भिमाद लगाएत तनहुँका अन्य स्थानिय तहमा कोरोनाको संक्रमण बढिरहेको छ ।

साथै भिडभाड हुने खेलकुद तथा सांस्कृतिक कार्याक्रम नगराउन समेत नगरपालिकाले अपिल गरेको छ ।

त्यस्तै स्वास्थ्य मापदण्ड पालन गरि सुरक्षित रहन समेत नगरपालिकाले नगरबासीमा अनुरोध गरेको छ ।