पोखरा । गण्डकी प्रदेशका मुख्यमन्त्री पृथ्वीसुब्बा गुरुङले पोखराको फेवातालको सिमाङ्कनको काम तीन महिनाभित्र सकिने बताएका छन् । पोखरा पर्यटन परिषदको २० औं वार्षिक साधारणसभा तथा ११ औं अधिवेशनको उद्घाटन गर्दै उनले लामो समयदेखि विवादित रुपमा रहेको सिमाङ्कनको काम सकेर मुआब्जा वितरणमा लाग्ने बताए ।

उनले नेपाल ट्रस्ट अन्र्तगत रहेको फेवाताल किनारमा अवस्थीत हिमागृह, रत्न मन्दिर सर्बसाधारणका लागि छिट्टै खुल्ला गरिने बताए । ४ महिना अघि खुला गरिसक्ने निर्णय भएपनि विभिन्न कारणले रोकिएको भन्दै उनले यो प्रक्रिया छिट्टै टुङ्गिने जिकिर गरे ।

कार्यक्रममा गण्डकी प्रदेशसभा सदस्य राजीव पहारीले कोभिड–१९ का कारण पोखराको पर्यटन क्षेत्र विषम र कष्टकर अवस्थामा रहेको बताए । विगत ५० वर्षदेखी यहाँको पर्यटनमा द्वन्द, भूकम्प, नाकाबन्दी र अहिले कोरोनाका कारण समस्याबाट गुज्रिरहेको पर्यटन क्षेत्रलाई उकास्न जोड दिएर सबै क्षेत्र लाग्नुपर्ने अवस्था आएको बताए ।

कार्यक्रममा पर्यटन क्षेत्रमा कलम चलाउँदै आएका पत्रकार सन्तोष पोखरेललाई सम्मान गरिएको थियो ।अधिवेशनले परिषद्को अध्यक्षमा  गोपीबहादुर भट्टराईलाई चयन पनि गरेको छ ।