पत्रपत्रिका । गण्डकी प्रदेशमा तीन महिनापछि आगामी मार्च महिनामा कोरोना विरुद्धको भ्याक्सिन ल्याउने तयारी गरिएको छ । गण्डकी प्रदेशको स्वास्थ्य आपूर्ति व्यवस्थापन केन्द्रको सहकार्यमा संघीय सरकारको सहयोगमा मार्चमा पहिलो चरणमा राहतस्वरुप कोरोनाको भ्याक्सिन ल्याउने तयारी भएको केन्द्रका निर्देशक खिमबहादुर खड्काले बताए ।

गण्डकी प्रदेशको राजधानी पोखरामा भ्याक्सिनको भण्डारण तथा वितरण हुने भएको उनले जनाए । हाल नेपालमा २ देखि ८ डिग्री सेल्सियस तापक्रममा व्यवस्थापन गर्नुपर्ने भ्याक्सिन प्रदेशको लागि उपयुक्त वातावरण हुने निर्देशक खड्काले बताए । गण्डकी प्रदेश सरकारले पहिलो चरणमा भ्याक्सिन भण्डारणको लागि ४० लाख रुपैयाँ विनियोजन गरेको बताए ।

पश्चिमाञ्चल क्षेत्रिय अस्पताल (पोखरा स्वास्थ्य विज्ञान प्रतिष्ठान) पोखराको परिसरमा भण्डारण कक्षा निर्माण भइरहेको उनले बताए । नेपाल सरकारले हाल १२ प्रकारका विभिन्न खोप निःशुल्क रुपमा वितरण गर्दै आएकाले रुवेला, दादुरा जस्तै अभियानमा कोरोना विरुद्धको भ्याक्सिन समेत लगाइने निर्देशक खड्काले दाबी गरे । पोखरामा करिब ५ लाख भ्याक्सिन भण्डारण हुने गरी हाल भण्डारण कक्ष निर्माण गर्न लागिएको उनले बताए ।

आजको कारोबार दैनिकमा समाचार छ ।