पोखरा – मंगलबार पोखराका २५ सहित गण्डकीमा थप २६ जनामा कोरोना पुष्टि भएको छ ।

आज गण्डकीका १९९ नमुना परीक्षण गर्दा थप २६ जनाको रिपोर्ट कोरोना पोजेटिभ आएको प्रदेश स्वास्थ्य निर्देशनालयले जनाएको छ ।

आज पुष्टि भएका संक्रमित गण्डकीका दुई जिल्ला कास्की र बाग्लुङका छन् । जसमध्ये कास्कीको पोखरा महानगरका २५ जना र बाग्लुङ जिल्लाका १ जनाको रिपोर्ट पोजेटिभ आएको हो ।

आज थपिएका संगै गण्डकीमा कोरोना संक्रमितको कूल संख्या १५ हजार ५ सय ९१ पुगेको छ । जसमा ३८९ सक्रिय संक्रमित छन् ।

पछिल्लो २४ घन्टामा गण्डकीबाट २५ जना कोरोनामुक्त भएका छन् । यो संगै, प्रदेशमा कोरोनामुक्त हुनेको संख्या १४ हजार ९९९ पुगेको छ ।

हालसम्म गण्डकीमा कोरोना संक्रमणकै कारण २०३ जनाले ज्यान गुमाईसकेका छन् भने, गण्डकीमा मंगलबारसम्म १६ हजार २७० जनाले कोरोना विरुद्धको खोप लगाएको निर्देशनालयले जानकारी दिएको छ  ।