काठमाण्डौ – प्रधानमन्त्री केपी शर्मा ओलीले हाररजितको ठूलो महत्त्व रहेको भन्दै नेपाल कहिले पनि नहारेको देश रहेकाले खेल पनि जितका लागि खेल्न आग्रह गरेका छन् ।

राष्ट्रिय खेलकुद परिषद्ले मङ्गलबार काठमाण्डौमा गरेको खेलकुदसँग प्रधानमन्त्री अन्तरक्रियालाई सम्बोधन गर्दै प्रधानमन्त्री ओलीले भने, लडाइँमा नहार्ने देश यत्रा–यत्रा डल्लासँग किन हार्ने ? खेल भन्या के हो ? एउटा भकुण्डो नै हान्ने त हो नि । किन हार्ने ? क्रिकेटमा एउटा बल हान्ने हो, त्यसमा किन हार्ने ? सितेरियो, कराँते, कम्भु र भारत्तोलन, किन हार्ने ?

अशान्ति जित र हारका आधारमा हुने भन्दै ओलीले भने- ‘प्रतिनिधि सभा भङ्ग भइसक्यो चुनाव हुन लागिसक्यो, हुनुहुँदैन भनेर कराइरहेका छन्, त्यो जितका लागि हो ।’ उनले जीतका लागि अति आवश्यक, अपरिहार्य र न्यूनतम आवश्यकता परिपूर्ति गर्ने गरि सरकारले खेल क्षेत्रलाई सहयोग गर्ने प्रतिबद्धता जनाए ।

पछिल्लो समय आवश्यक सामान किन्नका लागि नभइ राम्रो देखिएको सामान किन्नका लागि ‘शपिङ’ मा निस्कने चलन देखिएको भन्दै उनले भने– चाहिएको कपडा, सामान किन्नका लागि होइन, राम्रो देख्यो उठायो । सरकारले शपिङका लागि होइन, चाहिएको सामान किन्नका लागि सहयोग गर्न सक्छ । गच्छेअनुसारको सहयोग गर्छ । आउँदो वर्ष पहिलेको बजेटभन्दा बढेर आउँछ ।