पोखरा सराङ्कोटमा ड्युटीमा खटिएका प्रहरीको लडेर ज्यान गएको छ । पोखरा वडा नम्बर १८ सराङ्कोट वडा कार्यालय भवनसँगै रहेको तेश्रो तलामा रहेका प्रहरी जवान ३२ बर्षिय ठग बहादुर आलेको अस्पताल लैजानु अगावै मृत्यु भएको जनाइएको छ ।

गोरखा जिल्ला घर भएका आले करिब एक वर्ष अगाडि देखि सराङ्कोटमा थिए । उनी लडेपछि साथीहरुले उद्धार गरी उपचारका लागि मनिपाल अस्पताल लगेकोमा डाक्टरले मृत्यु भइसकेको घोषणा गरेका हुन् ।

प्रहरी भवन नहुँदा जवानहरु वडा कार्यालयमा बसदै आएका छन् । मंगलबार बिहान ३ देखि ६ बजेको बिचमा खसेको अनुमान गरिएको छ । कस्की प्रहरीका अनुसार मृतक आलेले मद्यपान गरेका थिएनन् । रातको समयमा निद्राले खसेको हुनसक्ने प्रहरीको आशंका छ ।

आलेको शव पोस्टमार्टमको लागि पोखरा पश्चिमाञ्चल क्षेत्रीय अस्पताल लगिएको छ । घटनाका सम्बन्धमा अनुसन्धान भइरहेको र पोस्टमार्टम रिपोर्टपछि थप कुरा खुल्ने कास्की प्रहरीले जनाएको छ ।