पोखरा । सोमबार गण्डकीमा थप ३४३ जनामा कोरोना पुष्टि भएको छ ।

प्रदेश स्वास्थ्य निर्देशनालयको दैनिक कोरोना सम्बन्धी विज्ञप्ति अनुसार पछिल्लो २४ घण्टामा गण्डकीका १ हजार १७३ जनामा गरिएको नमुना परीक्षणमा थप उक्त संख्याका मानिसको रिपोर्ट कोरोना पोजेटिभ आएको हो ।

आज संक्रमण पुष्टि हुनेमा प्रदेशका नौ जिल्लाका छन् । जसअन्तर्गत कास्कीका ५८ जना, तनहुँका पाँच जना, गोरखाका ३० जना, लमजुङका ३५ जना, नवलपुरका ५१ जना र स्याङ्गजाका एक जनामा कोरोना पुष्टि भएको छ।

यस्तै, पर्वतका ३८ जना, बागलुङका १२० जना र म्याग्दी जिल्लाका पाँच जनाको परीक्षण रिपोर्ट कोरोना पोजेटिभ आएको जारी विज्ञप्तिमा जनाइएको छ ।

आज थपिएकासंगै गण्डकीमा कोरोना संक्रमितको कूल संख्या ५० हजार ६४७ पुगेको छ ।

पछिल्लो २४ घण्टामा गण्डकीबाट ८४२ जना कोरोनामुक्त भएका छन् । योसंगै, प्रदेशमा कोरोनामुक्त हुनेको संख्या ४४ हजार ४६१ पुगेको छ।

सोमबार पनि गण्डकीमा थप १२ जनाको मृत्यु पुष्टि भएको छ । आज मृत्यु पुष्टि हुनेमा कास्कीका एक जना, तनहुँका एक जना, लमजुङका दुई जना, नवलपुरका तीन जना, पर्वतका दुई जना, म्याग्दीका एक जना र मुस्ताङ्ग जिल्लाका दुई जना छन् ।

आज मृत्यु पुष्टि भएकासंगै गण्डकीमा कोरोना संक्रमणका कारण ज्यान गुमाउनेको संख्या ८५० पुगेको निर्देशनालयले जनाएको छ ।