गण्डकी प्रदेशमा आज ६ जना नयाँ मन्त्रीको नियुक्तिसँगै ११ सदस्यीय मन्त्रीमण्डल बनेको छ । काँग्रेसले मुख्यमन्त्रीसहित ५ पाउँदा माओवादी केन्द्रले अर्थमन्त्रीसहित ४ र जसपा एक मन्त्रीमै चित्त बुझाउन बाध्य हुँदा स्वतन्त्र दीपक मनाङे मन्त्री छन् । माओवादीकी १ जना बाहेक कुनै पार्टीले महिलालाई मन्त्रीमा पठाएन । काँग्रेसले नदिएपछि जसपाकी धनमाया लामाको तिक्तता चर्को छ ।

काँग्रेसबाट मुख्यमन्त्री कृष्णचन्द्र नेपाली पोखरेल (नवलपुर) सहित कास्कीका कुमार खड्का भौतिक पूर्वाधारमन्त्री, बाग्लुङ सांसद मणिभद्र शर्मा कँडेल उद्योग, पर्यटन मन्त्री, स्याङ्जाका मेखलाल श्रेष्ठ सामाजिक विकास मन्त्री र कास्कीका बिन्दुकुमार थापा कानुन, सञ्चार तथा प्रदेश मामिला मन्त्री नियुक्त भए ।

पौडेल पक्षको उपस्थिति शून्य

तनहुँका डोबाटे विश्वकर्मा मन्त्री हुनेमा समावेशीताका आधारमा पनि सम्भावना बलियो मानिएको थियो । विश्वकर्मा हिजो मन्त्री बन्ने सूचीमा परेका थिए । काँग्रेस श्रोतका अनुसार अन्तिम अवस्थामा उनको नाम काटिएको हो । विश्वकर्मा रामचन्द्र पौडेल पक्षधर हुन् ।

गण्डकी क्याबिनेटमा रामचन्द्र समूहको उपस्थिति शून्य हुन पुगेको छ । मुख्यमन्त्रीसहित काँग्रेसका ५ जनामध्ये ३ जना संस्थापन देउवा प्यानलका छन् भने १ जना गोपालमान श्रेष्ठ छन् । नवलपुरका मुख्यमन्त्री सशांक कोइराला निकट छन् ।

बिन्दुको ‘इन्ट्री’

मुख्यमन्त्री नियुक्तिपछि पहिलो दिन नै मन्त्रीमा आकांक्षी कास्कीका बिन्दुकुमार थापा अन्ततः मन्त्री बन्न सफल भएका छन् । मन्त्रीको सपथ खान दौरा सुरुवालमा ठाँटिएर समारोहमा पुगेका बिन्दुलाई मन्त्री नियुक्त नगरिएपछि उनी पार्टी परित्याग गरी एमाले प्रवेश गर्ने  मनस्थितिमा समेत पुगेका थिए । परिवारबाटै चर्को दबाबले उनी पछि हटेको हल्ला बाहिर आयो ।

मन्त्री बन्न उनको अग्रसरतालाई अन्यथा लिन पनि सकिन्न । उनी कास्कीमा काँग्रेसको बिउ जोगाउने एकमात्र उम्मेदवार पनि हुन् । कास्कीका ३ प्रतिनिधि सभा र ६ प्रदेशसभा सदस्यका लागि भएको निर्वाचनमा बिन्दु एक्लैले काँग्रेसबाट जितेका हुन् ।

एमाले र माओवादीको बाम गठबन्धन हुँदा काँग्रेस कास्कीमा बढारिन पुगेको थियो । माओवादीका राजकाजी गुरुङ (करण)लाई पराजित गर्दै कास्की २ (ख) बाट बिन्दु निर्वाचित भएका थिए । काँग्रेसको बिउ जोगाउन सकियो भनेर काँग्रेसीजनहरु औधी खुशी भएका थिए । अहिले आफै भिडेको माओवादी पार्टीसँगकै आफ्नो नेतृत्वको गठबन्धनको सरकारमा उनी मन्त्री बन्न पुगेका छन् ।

काँग्रेसको झण्डा बोकेरै दशकौं राजनीति गर्नेहरु वडा सदस्यमा समेत पुग्न नसकिरहेका बेला व्यापारिक क्षेत्रबाट पार्टी राजनीतिमा होमिएका व्यक्तिलाई सांसद टिकट दिने ? भन्दै केही असन्तुष्टि थियो । पैसाको बलमा राजनीतिमा माथि पुगेको आरोप उनीमाथि पार्टीकै कार्यकर्ताले लगाउँछन् । पार्टी स्थानिय राजनीतिमा परिचित अनुहार नरेशशंकर पालिखे बागी उठ्दासमेत उनले करणलाई हराउन सफल भएका थिए । आर्थिक हैसियतमा माथि रहेका थापा शीर्ष नेताहरुलाई प्रभावमा पार्दै अन्ततः मन्त्री बन्न पुगेका छन् ।

सम्बन्धित समाचारः

गण्डकी मन्त्रीपरिषद्को पूर्णताः मुख्यमन्त्रीसहित काँग्रेस ५, माओवादी ४, जसपामाथि फेरि धोका

गण्डकीमा ६ मन्त्री थपिए, लिए सपथ, परेनन् महिला

कास्कीबाट पहिलो प्रदेशसभा सदस्य काँग्रेसका बिन्दुकुमार थापा (फोटो फिचर)