पोखरामा आइतबार बिहान कार दुर्घटना हुँदा एक जनाको मृत्यु भएको छ । दुई महिला घाइते भएका छन् । मृत्यु हुनेमा कार चालक बद्री खत्री रहेका छन् । उनको घर नवलपरासी रहेको खुलेको केसीले जनाए । घाइते दुई महिलाहरु सपना घोताने र किरण अर्याल रहेका छन् ।

पोखरा महानगरपालिका-१८, मेथलाङमा सबेरै सडकबाट कार खसेको सूचना पाएपछि प्रहरी घटनास्थल पुगी उद्धारकार्यमा जुटेको थियो । उद्धार कार्यमा स्थानियले पनि सघाएका थिए । एक पुरुष र दुई महिलाको उद्धार गरिएकोमा पुरुषको मृत्यु भएको जिल्ला प्रहरी कार्यालय कास्कीका प्रहरी निरीक्षक एवं निमित्त प्रहरी प्रवक्ता दीपक केसीले जानकारी दिए ।

प्रहरीका अनुसार घाइतेहरुको सहारा अस्पतालमा उपचार भइरहेको छ । उनीहरुको अवस्था खतरामुक्त रहेको छ । दुवै जनाले आफूहरु पोखराकै रहेको बताएको प्रहरीले जनाएको छ ।

ग १ च ७२३४ नम्बरको सिल्भर कलरको कार सडकबाट तल खसेको अवस्थामा बिहान स्थानियले देखेका थिए । प्रहरीलाई खबरपछि वडा प्रहरी कार्यालय, बगरबाट टोली खटिएका थिए ।

दुर्घटनामा घाइते भएका चालक खत्रीलाई पश्चिमान्चल क्षेत्रीय अस्पताल लगिएकोमा चिकित्सकले बिहान ९ः४० बजे मृत घोषणा गरेका हुन् । दुर्घटनाको कारणबारे अनुसन्धान भइरहेको प्रहरीले जनाएको छ ।