काठमाडौँ । सरकारले अफगानिस्तानमा रहेका नेपालीको छिटो उद्धार गर्ने निर्णय गरेको छ ।

मन्त्रिपरिषद्को आज सोमबार बिहान बसेको बैठकले अफगानिस्तानमा रहेका नेपालीलाई सकुशल रूपमा छिटो उद्धार गर्ने निर्णय गरेको हो ।

त्यसका लागि नेपाल सरकारका सम्बन्धित निकायलाई समन्वयात्मक रूपले काम गर्न निर्देशन दिएको जनाइएको छ ।

त्यहाँ करिब १५ सय नेपालीहरु रहेको अनुमान छ ।

यस्तै, सरकारले बेलायतमा जारी आमरण अनसन फिर्ता लिन भूतपूर्व ब्रिटिस गोर्खाहरुलाई आग्रह गरेको छ । बैठकले सम्बोधन हुन बाँकी समस्या कूटनीतिक माध्यमबाट समाधान गर्ने प्रतिवद्धता समेत जनाएको छ ।

आफूहरु विरुद्ध भेदभाव भएको भन्दै पूर्वगोर्खा सैनिकहरु बेलायतको प्रधानमन्त्री कार्यालय अगाडि अनशन बसेका छन् ।

यसअघि गत महिना गोर्खाहरूका मागसँग सरोकार राख्ने पाँचवटा संस्था र गैरआवसीय नेपाली सङ्घ युकेलगायतले नेपाल सरकार र बेलायत सरकार दुवैलाई पत्र पठाएका थिए । पत्रमा भूपू गोर्खाहरूको समान पेन्सनलगायतका माग राखेर वार्ताका लागि आग्रह गरिएको थियो ।