पोखरामा पहिरोले घर पुरिँदा तीन जनाको मृत्यु भएको छ । बुधबार साँझदेखि परेको अविरल वर्षाका कारण पोखराका विभिन्न ठाउँमा पहिरोले जनधनको क्षति गरेको हो ।

भलाममा दम्पतीको मृत्यु, छोरा बेपत्ता

पोखरा २०, भलाममा दम्पतीको मृत्यु भएको छ । ब्लकबाट निर्मित एकतले घरमाथि पहिरो झर्दा ४५ वर्षीय कृष्ण श्रेष्ठको मृत्यु भएको छ । उनकी ३५ वर्षीया श्रीमती सुनमाया तामाङ श्रेष्ठको पनि ज्यान गएको कास्की प्रहरी प्रवक्ता, डिएसपी सुवास हमालले जानकारी दिए ।

जिल्ला प्रहरी कार्यालय, कास्कीका अनुसार टाउकोमा गम्भिर चोट लागेका कृष्णको उपचारको क्रममा मृत्यु भएको हो । श्रीमती सुनमायाको भने घटनास्थलमै ज्यान गएको हो । दुई छोरामध्ये एक जना वेपत्ताा छन् । एक घाइते भएका छन् । ३ वर्षीय छोरा सन्तोष वेपत्ता छन् भने ९ वर्षीय छोरा राजकुमार घाइते छन् । उनको टाउकोमा चोट लागेको प्रहरीले जनाएको छ ।

पोखरा ११ मा एकको मृत्यु, ४ घाइते

 पोखरा ११ मा एक जनाको मृत्यु भएको छ । ४ जना घाइते भएका छन् ।

भञ्ज्याङ नमुना टोल स्थित ४२ वर्षीय लक्ष्य नेपालीको ब्लकले बनेको घर भत्कँदा नेपालीको मृत्यु भएको हो । उनकी १४ बर्षिया छोरी सृष्टी नेपाली घाइते भएकी छन् । उनको दुबै खुट्टा र ढाँडमा चोट लागेको प्रहरीले जनाएको छ ।

घटनापछि नेपालीलाई उद्धार गरी उपचारको लागि मणिपाल शिक्षण अस्पतालमा लागिएकोमा राति १ स् २८ मा मृत्यु भएको भएको प्रहरीको भनार्य छ । नेपालीकी श्रीमती र २ छोराहरूलाई सकुशल उद्धार गरी पोखरा ११ फूलबारी स्थित मामाको घरमा पठाइएको छ ।

यस्तै, घर माथिबाट पहिरो आई घर पुरिन जाँदा पोखरा – ११ बसेरीका ४० वर्षीय एकदेव तिमिल्सिना, उनकी श्रीमती ३८ वर्षीया ऋतु र छोरा १९ वर्षीय गिरीश घाइते भएको प्रहरीले जनाएको छ ।

तस्वीरः पत्रकार सूर्य बास्तोला मार्फत्