पोखरामा लगातार वर्षाले विभिन्न ठाउँमा क्षति पुगेको छ । पोखरा महानगरपालिका वडा नं. २२ पुम्दी भुम्दी, भ्यूपोइन्ट क्षेत्रमा सिद्धार्थ राजमार्गमा ठूलो पहिरो गएको छ ।

मध्येराति १२ बजेतिर पहिरो जाँदा सिद्धार्थ राजमार्ग पूर्ण रुपमा अवरुद्ध भएको छ । मूल सडकमुनीसम्म पहिरो पुग्दा सहायक बाटोहरुमा पनि क्षति पुगेको छ । राजमार्ग माथिबाट खसेको पहिरोले सडक पुरिनुका साथै सडकको तल्लो भागमा रहेका पशुपन्छीका खोरहरू र सहायक बाटाहरूमा समेत असर पुगेको पोखरा २२ का वडा सदस्य मात्रिका बरालल जानकारी दिए ।

पहिरोका कारण राजमार्गमा दुबैतर्फ सवारीसाधन जाममा परेका छन् । सहायक बाटाहरू बन्द हुँदा स्थानीय कृषकको दूध, तरकारी तथा डेरीको दूध आपूर्तिमा समस्या उत्पन्न भएको बरालले बताए ।

बिजुलीको मुख्य प्रसारण लाइनको पोल खस्दा बिद्युत् र इन्टरनेट सेवा अवरुद्ध भएको छ । पहिरो हटाई राजमार्ग खुलाउन प्रयास भइरहेको वडा सदस्य बरालले जानकारी दिए ।