हेटौंडा । मकवानपुरको हेटौंडामा देउसी खेलिरहेको समूहमाथि बस गुड्दा दुई जनाको मृत्यु भएको छ । आठ जना घाइते भएका छन् ।

गएराती हेटौंडाबाट चितवनतर्फ जाँदै गरेको बागमती प्रदेश ३० ००१ ख ०९३६ नम्बरको बसले हेटौँडा उपमहानगरपालिका–१९ नेवारपानीमा देउसी खेलिरहेका स्थानीयको समूहलाई ठक्कर दिएको हो ।

बसको ठक्करबाट हेटौँडा–१९ नेवारपानीका २० वर्षका सुरज विष्ट र चितवन पिप्ले–३ का ३४ वर्षका प्रेमबहादुर सिंह ठकुरीको ज्यान गएको प्रहरीले जनाएको छ ।

घाइते आठ जनामध्ये पाँच जनाको चुरेहिल अस्पताल र २ जनाको चितवन मेडिकल कलेजमा उपचार गरी डिस्चार्ज भएका छन् । एक जनाको चितवन मेडिकल कलेजमा उपचार भइरहेको छ । उनको अवस्था गम्भीर रहेको प्रहरीले जनाएको छ ।

घटनापछि बस चालकलाई प्रहरीले पक्राउ गरेको छ । घटनापछि स्थानीयले बसमा आगो लगाईदिएका छन् भने आगो निभाउन गएको दमकलमा पनि तोडफोडको प्रयास भएपछि प्रहरीले लाठीचार्ज गरेको थियो ।