पोखरा । लागुऔषध मुद्धामा बुधबार पक्राउ परेका ’लाउरे’ नामले चर्चित र्‍यापर आशीष राना मगरलाई थप अनुसन्धानका लागि कास्की प्रहरीले ८ दिन म्याद थपेको छ । हिजो सार्वजनिक बिदाका कारण म्याद थप हुन सकेको थिएन । आज ८ दिन म्याद थप गरिएको कास्की प्रहरीले जनाएको छ ।

प्रहरीसँगको प्रारम्भिक बयानमा उनले आफूले लागुऔषध प्रयोग गर्ने गरेको स्विकार गरेका छन् । लाउरे बुधबार पोखराको न्यूरोड नजिकै जाल्पारोडको एक घरको कोठाबाट पक्राउ परेका थिए । युवतीसँगै रहेका र्‍यापर लाउरे र अन्य दुई युवक पनि पक्राउ परेका हुन् ।

लाउरे पाेखरा ९ नयाँबजार निवासी हुन् । युवती स्याङ्जा भिरकोट नगरपालिका ६ घर भई पोखरा – ८ सभागृह बस्ने २२ वर्षिया सुस्मिता गुरुङ हुन् । यस्तै, लागुऔषध कारोबारी पोखरा २१ घर भई हाल पाेखरा १७ छोरेपाटन बस्ने ३९ वर्षिय ध्रुबहादुर थापा र कास्कीकाे रूपा ७ घर भइ पाेखरा १ बगर बस्ने ३० वर्षिय बिक्कि भन्ने नवीन गुरुङ पक्राउ परेका हुन् । उनीहरु लागुऔषध कारोबारी हुन् ।

उनीहरुको साथबाट १३.०१ ग्राम लागुऔषध प्रहरीले फेला पारेको थियो । लाउरे कास्की प्रहरीको हिरासतमै छन् ।

कारोबार पुष्टि भएको अवस्थामा र्‍यापर लाउरे कम्तिमा ५ वर्षसम्म जेल जान सक्छन् । यदि कारोबार गरेको पुष्टि नभएको तर सेवन मात्र गरेको पुष्टि भएको अवस्थामा एक वर्षसम्म कैद र १० हजारसम्म जरिवाना हुन सक्नेछ । एक वर्षसम्म कैद हुने मुद्दामा चिकित्सा केन्द्रमा उपचार गराउने गरी परिवारले जिम्मा लिएर पनि जान सक्नेछ ।

सम्बन्धित समाचारः

चर्चित र्‍यापर आशिष राना ‘लाउरे’ पोखराबाट पक्राउ

‘लाहुरे’ले ड्रग्स सेवन गर्ने स्वीकारे, प्रहरीसँग भने– ‘ड्रग्स नखाई कार्यक्रममा जान सक्दिनँ’

कारोबार पुष्टि भए ५ वर्ष जेल, सेवनको हकमा १ वर्ष