पोखरा । अनुमति नलिई सेतो सिमेन्ट बजार पठाउने पोखराको एउटा उद्योगलाई जरिवाना तिराइएको छ । पोखरा औद्योगिक क्षेत्रस्थित आरती पेन्टिङ उद्योग प्रालिलाई गण्डकी प्रदेश सरकार मातहतको प्रदेश बजार अनुगमन टोलीले बिहीबार जरिवाना तिराएको हो ।

सेतो सिमेन्ट अनुमति बिनै बिक्री गरेको उक्त उद्योगलाई ५० हजार रुपैयाँ जरिवाना गरिएको अनुगमन टोली संयोजक एवं उद्योग वाणिज्य तथा उपभोक्ता हित संरक्षण निर्देशनालय गण्डकीका निर्देशक नारायण आचार्यले बताए । ‘पेन्टिङ सामग्रीको उत्पादन र बिक्रीको अनुमति लिएको त्यो उद्योगलाई प्याकेजिङको अनुमति छैन । बाहिरबाट ल्याएको सामान रिप्याकेजिङ गर्नु गैरकानुनी हो । त्यही कसुरमा जरिवाना गरेका हौँ,’ आचार्यले भने ।

बजारमा बिना लेबलिङको सेतो सिमेन्ट बिक्री भएको गुनासो दर्ता भएपछि अनुगमन टोलीले अनुगमन गरेको थियो । उद्योगीले सेतो सिमेन्ट रङ बनाउन प्रयोग हुने भएकाले प्रयोग गरेको बताएका छन् ।

अनुगमन टोली सदस्य एवं उपभोक्ता मञ्च गण्डकीका अध्यक्ष कपिलनाथ कोइराला कतै लेबलिङबिनाका उत्पादन भेटिए खबर गर्न आग्रह गर्छन् । ‘उपभोक्तालाई मर्का पर्ने कुनै पनि कारोबार नगर्न हामी सबै व्यवसायीलाई आग्रह गर्छौँ । उत्पादन मिति भए/नभएको कुरा उपभोक्ताले हेर्नुपर्छ । केही समस्या भए उपभोक्ता अधिकारका लागि हामी छौँ,’ उनले भने ।

रिप्याकेजिङ गरिएको सिमेन्ट बिक्री गर्न राख्ने हाडवेयरलाई पनि जरिवाना गरिएको अनुगमन टोलीले जनाएको छ । पोखरा १७, बिरौटास्थित कमल हाडवेयरले लेबल नै नभएको उक्त सिमेन्ट बिक्रीमा राखेको भेटिएपछि पाँच हजार रुपैयाँ जरिवाना तिराइएको संयोजक आचार्यले जानकारी दिए ।